दोडक्याचा भात.

अर्धा किलो दोडकी. (शिराळी)
दोन वाट्या बासमती तांदूळ.
१ वाटी ताक
१ वाटी पाणी
४ हिरव्या मिरच्या
२" आलं
२ चमचे (टी-स्पून) धण्याची पावडर
१चमचा (टी-स्पून) जिर्‍याची पूड
मीठ चवीनुसार.
फोडणीसाठी तेल आणि मोहरी.
ओलं खोबरं
कोथिंबीर.
साजूक तुप
प्रथम तांदूळ तासभर भिजत घालावेत, नंतर निथळवून घ्यावेत.
दोडक्याच्या शिरा काढून दोडकी किसून घ्यावीत.
आलं आणि मिरच्या वाटून घ्याव्यात. (मिक्सर मधून काढाव्यात)
एका जाड बुडाच्या पातेल्यात तेल तापवून मोहरीची फोडणी करावी आणि त्यावर दोडक्यांचा किस टाकून परतून घ्यावा.
चवीनुसार मिठ घालावे. एक वाफ येऊ द्यावी.
आता त्यावर निथळविलेले तांदूळ घालून परतावे.
आलं -मिरच्यांचं वाटण, धणे-जिर्‍याची पुड, ताक आणि पाणी घालून नीट एकत्र करावं आणि घट्ट झाकण लावून अतिमंद आंचेवर जवळ-जवळ अर्धा तास भात शिजवावा. (मधे एकदा हळूवार हाताने वरखाली करावा)
भात शिजला की त्यावर साजूक तूप घालावे.
वाढताना कोथिंबीर आणि नारळाने सजवावा.

शुभेच्छा.

अगदी मसाले भाता( वांगी घालून) सारखा दिसत आहे...:)
मस्त रेसिपी....दोडका किसून कधी केला नाही...नुसते चौकोनी तुकडे घालून करत होते..ही पण करून पाहिन....
बाकी, ताक कशासाठी? काय प्रयोजन असावे? का फक्त चवीसाठी?

सुरेख. अस वाटत आहे कोणी तरी गरम गरम भात माझ्या समोर ठेवला आहे आणि काही क्षणात मला तो मिळणार आहे.
एवढी सोप्पी पाककृती नक्की करुन बघायलाच पाहिजे...!!!!
या विकांताला नक्की करणार.

--@-- स्नेहश्री रहाळ्कर.--@--
आनंदाचे क्षण असतातच जगण्यासाठी
दुःखाचे क्षण असतातच विसरण्यासाठी
पण खुप काही देउन जातात हे
आयुष्यात पुढे जाण्यासाठी

अरे वा छान पाककृती. :)
करून नक्की पाहिन.
काका,
राईसच्या मस्त पाकक्रुती अजुन असतील तरी ही सांगा मी राईसवर नेहमी वेगवेगळे प्रयोग करून पहात असते. :)