सुरमई शाम (मां.) आणि वाङ्मयीन संध्याकाळ (शा.)

साहित्य : पीत असलात तर तीन पेग व्हिस्की (रॉयल च्यालेंज), पाव किलो मध्यम आकाराचा सुरमई, दोन मोठे चमचे बेडेकर लोणच्याचा तयार मसाला, चार तेवढ्याच आकाराचे चमचे तेल, थोडा रवा, थोडा मैदा, दोन चिमटी मीठ,एक चांगली म्युझिक सिस्टीम, आणि घरात बायकोचा अभाव हे सगळं जमवा. दोन चमचे बेडेकर लोणच्याचा तयार मसाला चार चमचे तेलात मिसळा. सुरमईच्या कापांना त्यात बुडवा. पूर्ण माखला की तसाच प्लेटमध्ये घालून थोडावेळ फ्रीजमध्ये ठेवा. मैदा रवा आणि मीठ मिक्स करून घ्या. मग माखलेली आणि थंडावलेली सुरमई फ्रीजबाहेर काढून ती रवा-मैदा-मीठ-मिक्स मध्ये घोळवा. तव्यावर सढळ हस्ते तेल सोडून त्यावर सुरमईची खमंगता अनिवार होईपर्यंत परता.. प्लेटमध्ये सुरमई ठेवा.. प्याला भरा.. खालीलपैकी कोणत्याही गझली घ्या.: गुलाम अलीची "आवारगी" इक्बाल बानोची "मैं नजर से पी रहा हूं.." तिचीच "ना गवाओ नावके नीमकश.." गझल सीडीयंत्रात चालू करा.. पुढची सगळी सुंदर सुरमई शाम तुमचीच आहे..एकट्याची.. .... शाकाहारी असाल, मासोळी वर्ज्य असेल तर सुरमई ऐवजी वांगे वापरून सुरमई शामचा शाकाहारी आल्टर्नेट "वाङ्मयीन संध्याकाळ" बनवू शकता. सर्व रेसिपी तशीच. फक्त सुरमईच्या कापांऐवजी वांग्याचे काप. हाही प्रकार अतिशय चट्टाक चाबूक बनतो. उंगलियां चाटते रह जाओगे... ..मात्र यासोबत गझल ऐवजी पुस्तक वाचायला घ्या. शाळा किंवा तत्सम पुस्तक. पुढची स्वर्गीय वाङ्मयीन संध्याकाळ आपलीच..!! ........ यांना अनुक्रमे सुरमई बेडेकरी आणि बेडेकरी वांगे असेही म्हणता येते. ........ (ता.क. तीनच्यावर प्याले नकोत..नाहीतर ता.क. पिऊन उतरवण्याची वेळ यायची..)