बर्लायनर /बर्लिनर (डोनटस)

१६व्या शतकातली ही डोनटसची जुनी रेसिपी बर्लिनमध्ये उगम पावली म्हणून नाव अर्थातच बर्लिनर! जर्मनीभर हे बर्लिनर फानकुकन, पुफेल, बर्लिनर बालन(म्हणजे बर्लिनचे चेंडू), क्रापन, क्रेपेल अशा वेगवेगळ्या नावांनी प्रसिध्द आहेत. जॅम घालून केलेला हा डोनट ताजाताजा खाण्यातच मजा!

६३ साली ह्या बर्लिनरनी एक धमाल उडवून दिली होती. प्रेसिडेंट जॉन एफ केनेडी बर्लिनमध्ये आले असताना भाषणाची सुरुवात आणि शेवट त्यांनी झोकात जर्मन मध्ये केला. 'इष बिन बर्लिनर ' म्हणजे 'आय अ‍ॅम अ बर्लिनर' असे त्यांना म्हणायचे होते त्याऐवजी ते 'इष बिन आइन बर्लिनर' असे म्हणाले आणि एकच हशा उसळला कारण त्याचा अर्थ होता 'आय अ‍ॅम अ जेली डोनट (बर्लिनर)'!!!
असो..
आमचे आकिम आजोबा मूळचे बर्लिनचे,त्यांच्या वाढदिवसाला त्यांची आई हे बर्लिनर करत असे.युध्दकाळात रेशनिंगच्या दिवसातही मोठ्या कष्टाने तिने सारी सामग्री जमवून आजोबांच्या वाढदिवसासाठी ते केले होते. ती गेल्यानंतर आमची त्सेंटाआजी गेल्या वर्षापर्यंत आजोबांच्या वाढदिवसासाठी बर्लिनर करत असेच पण ह्या वर्षी मात्र तिने विकतचे बर्लिनर आणण्याचे ठरवल्यावर मला राहवले नाही आणि आम्ही त्यांना छोटेसे सरप्राइझ द्यायचे म्हणून ते करण्याचे ठरवले, त्याच सुमाराला केसुंचे येथे आगमन होणार आहे, असे समजल्याने त्यांच्या स्वागतार्थ बर्लिनर आणि राकलेटचा बेत आखला.

हाताशी भरपूर वेळ आणि शांतपणा असल्याशिवाय याच्या वाटेला जाऊ नये..
साहित्य-
५०० ग्राम मैदा, ६० ग्राम साखर, ६० ग्राम बटर, २ अंडी, १ कप कोमट दूध, १ चिमूट मीठ, तळणीसाठी तेल
२ वाट्या पीठीसाखर गार्निशिंगसाठी.
८० ग्राम फ्रेश यिस्ट ( जर्मनीत ४२ ग्रामचा एक फ्रेश यिस्ट क्यूब येतो तसे २ क्यूब्ज = ८४ ग्राम यिस्ट आजी घालते)
प्लम,चेरी,अ‍ॅप्रिकॉट कोणताही आवडीचा जॅम( ४५० ते ५०० ग्रामची बाटली.)
पेस्ट्री बॅग,२-३ स्वच्छ फडकी, २-३ मोठे ट्रे किवा ताटे, १वाटी

कृती-
कोमट दुधात साखर घालणे. त्यात यिस्ट घालून रवीने घुसळणे.मिश्रण एकजीव झाले पाहिजे.
मैद्यात चिमूटभर मीठ घालणे व त्यावर हे मिश्रण ओतणे व एखादे फडके घालून झाकून उबेशी १५ ते २० मिनिटे ठेवणे.
बटर पातळ करणे ते ह्या मिश्रणावर घालणे, २ अंडी त्यात फोडून घालणे आणि मळणे, भरपूर मळावे लागते. गोळा परातीत २,४ दा आपटणे. मऊसर गोळा झाला पाहिजे. हा गोळा परत फडक्याने झाकून उबेशी १५-२० मिनिटे ठेवणे.
पोळपाट /टेबल किवा प्लॅटफॉर्मवर मैदा भुरभुरणे, लाटण्यालाही मैदा चोळून घेणे. मिश्रण फरमेंट होऊन, हलके होऊन फुगले की त्यातील एक मोठा गोळा काढून घेणे आणि बाकीचे मिश्रण झाकून उबेशीच ठेवणे. हा गोळा परत एकदा पोळपाटावर आपटून जाडसर पोळी लाटणे. वाटीने त्याचे गोल आकार पाडणे व हे आकार एका ताटात अंतराअंतरावर ठेवून ते ताट झाकून उबेशी ठेवणे व दुसरी पोळी लाटणे व वाटीने डोनट्स कातणे.
एकीकडे तेल तापत ठेवणे व एका ताटलीत वाटीभर पिठीसाखर घालून ठेवणे. पेस्ट्रीबॅगेत जॅम भरुन त्यावर लहान टिप बसवा. तेल तापले की मध्यम आचेवर हे डोनट्स तळणे. गोल्डन ब्राउन झाले की टिश्यूपेपरवर घालणे व लगेचच पिठीसाखरेत घोळवणे, पेस्ट्रीबॅगेची टिप त्यात घुसवून जॅम भरणे.
डोनट गरम असतानाच जॅम आत भरला जातो व पिठीसाखरही त्यावर नीट बसते. त्यामुळे ही स्टेप वेळेत करणे महत्त्वाचे आहे.
असे सर्व डोनटस करणे व पोळ्यांच्या /फ्लॅट डब्यात भरुन ठेवणे.