भाववाढीच्या विरोधात मनसे काय कार्यवाही करेल ?

कृपया मिपावर गूगल डॉक्सच्या लिंका पेस्टवू नयेत. पूर्ण लेखच कॉपी पेस्ट करावा. आमच्या हापिसातून गूगलडॉक्स बॅनड् आहे . पुण्याचे पेशवे

माननीय राजसाहेब ठाकरे यांस, सर्वप्रथम विधानसभेतील यशाबद्दल आपले मन:पूर्वक अभिनंदन! मी बोरिवली पश्चिम उपनगरात रहाणारी एक गृहिणी असून, ’मनसे’ची मतदार आहे. सध्या आम्हा गृहिणींच्या दृष्टीने भेडसावणारी समस्या म्हणजे अन्नधान्य आणि भाजीपाल्याचे आवाक्याबाहेर गेलेले भाव. श्रीमंत माणूस पैसा टाकून विकत घेऊ शकतो, गरीब माणूस त्याशिवाय राहू शकतो. मधल्यामध्ये मध्यमवर्गाची कुचंबणा होते. आपण यातून काहीतरी मार्ग काढावा अशी आपल्याकडे विनंती आहे. मागच्याच आठवड्यात देवीच्या दर्शनाला म्हणून नाशिकला सहकुटुंब गेलो असताना , रस्त्यात वाटेने टॅमॅटो फेकलेले दिसले. अधिक चौकशीअंती , उत्पादकांना योग्य भाव न मिळाल्यामुळे त्यांनी ते न विकता निषेध म्हणून रस्त्यावर फेकून दिले. तुला नाही, मला नाही घाल कुत्र्याला अशी गत झाली. दूधाबद्दल ही अशी बातमी नेहमीच वाचनात येते. एकीकडे उत्पादकांना योग्य भाव दिला जात नाही दुसरीकडे आमच्यासारख्या मध्यमवर्गाला मात्र भाववाढ करून नाडले जाते. विधानसभेच्या निवडूकांच्या ’शिवसेनेच्या जाहिरनाम्यात, ’आपलं सरकार येतयं, भाववाढ होऊ देणार नाही, असे वचन दिले होते. अर्थातच्‌ ते न आल्याने आता भाव स्थिर ठेवण्याकरता शिवसेना बांधील नाही आणि त्यात त्यांना रसही नाही. राष्ट्रवादीनेही त्यांच्या जाहीरनाम्यात भाव स्थिर ठेवू असे वचन दिले होते. पण गंमत अशी की, ज्यांचे सरकार मुळातच सत्तेत असतानाही गेले काही महिने तूरडाळ , साखर, इतर अन्नधान्य यांचे भाव स्थिर राहू शकले नव्हते ते पुन्हा निवडून आल्यानेही काही फरक पडणार नव्हताच. आणि तसेच झाले , दिवाळीच्या तोंडावर आलेल्या निवडणूकांमुळे स्थिर राहिलेले साखरेचे भाव निकालानंतर आठवड्याभरात रु.३४/-प्रति किलो वरून रु.४२/- प्रति किलोवर गेले. असो,त्या विरोधात आपण पाऊले उचलल्यास महाराष्ट्रातील आपली मतदार नसलेलीही जनता आपल्या बाजूने यायला वेळ लागणार नाही. मुंबईत बहुतेक भाजीपाला नाशिकहून येतो. नाशिक मधून आपले तीन आमदार निवडून आल्याने आपल्याला त्या बाबतीत सगळे सहकार्य तिथून मिळू शकेल. प्रत्यक्ष उत्पादकाला; त्याला अपेक्षित असलेला दर देऊन त्यांच्याकडून विकत घेतलेले उत्पादन ’मनसे ने इतरत्र वाजवी दरात जनतेला उपलब्ध करून दिल्यास दोघांचाही फायदा होऊ शकेल. थेट उत्पादकाकडून उत्पादन विकत घेऊन घाऊक किमतीला विक्री करण्याच्या तत्वावर अनेक मल्टी लेव्हल कंपन्या आपली पोटं भरतात. तेच तत्व मनसेने वापरले तर ? मागे अश्या प्रकारच्या भाववाढीच्या विरोधात शिवसेनेने स्वत: भाजीवाल्यांचे स्टॉल्स उभे केले होते आणि वाजवी दरात भाजी मिळण्याची सोय केली होती. मनसेलाही अश्या प्रकारच्या मदतीची ही संधी आहे