ऊंधियु

ऊंधियु

साहित्य :
भाज्या : लहान वांगी, लहान कांदा व बटाटा, कंद, सुरण, राजळी केळी, घेवडा, तुरीच्या शेंगा,
ओल्या वालाच्या शेंगा, मटार, मेथी आणि सुरती पापडी ( ही नसेल तर ऊंधियु होणार नाही.)
मसाला : ओलं खोबरं, कोथिंबीर, जीरा पावडर, हळद, तिखट, ओली लसूण, मीठ, लिंबाचा रस, साखर, दाण्याचं कूट. कच्चा मसाला ( धने,जीरं,लवंग,दालचिनी थोडं भाजून त्याची पूड.चवीपुरतं मीठ)

इतर : तेल, पाणी, जीरं, मोहरी, बेसन, खायचा सोडा

कृती : प्रथम मसाला करून घेणे : ओली लसूण बारीक वाटून घ्या.
सर्व साहित्य एकत्र करून (लसणीसह) बाजूला ठेवा.हा मसाला ऊंधियुची चव ठरवतो त्यामुळे तिखटाचे प्रमाण यामधे कमी जास्त अर्थात प्रत्येकाच्या चवीप्रमाणे ठेवणे सोपे जाते.

मेथीचे गोळे : ( अर्थात मुठिया ) :
मेथी स्वच्छ निवडून व धुवून बारीक चिरून थोडे मीठ लावून ठेवावी आणि १० मिनीटानी हाताने गच्च पिळून घ्यावी जेणेकरून कडवटपणा कमी होईल.
मग त्यात बेसन,खायचा सोडा,चवीप्रमाणे मीठ,तिखट घालून घट्ट मळून घ्यावे व त्याचे लहान गोळे करून तेलात तळून घ्यावे.

लहान वांगी थोडं देठ ठेवून मागील भागावर आडवी उभी चीर मारून घ्यावी.कांदा व बटाटा सुद्धा सोलून अशाच प्रकारे कापावा.

राजळी केळी सालासकट कापावी. एका केळ्याचे ५ तुकडॆ करावे.

कंद , सुरण सोलून चौकोनी तुकडे करून घ्यावे व तेलात तळून काढावे आणि त्यावर थोडॆ मीठ व तिखट शिंपडावे.

घेवडा व सुरती पापडी निवडून घ्यावी , तूर, वाल व मटार शेंगा सोलून दाणे काढावे. हा सर्व शेंगांचा माल शिजवून घ्यावा.

वांगी,कांदा,बटाटा व केळी कच्चीच ठेवावी.
एका कढईत तेल व एका पातेल्यात पाणी गरम करण्यास ठेवावे.

एका जाड बुडाच्या पातेल्यात थोडॆ तेल गरम करून त्यात मोहरी , जीरं घालून फ़ोडणी तयार करावी. त्यात फ़क्त रंगापुरते हळद व तिखट घालावे.
मग त्यात सर्व कच्च्या भाज्या वांगी,कांदा,बटाटा घालावा २ मिनीटे ढवळून मग थोडा मसाला व मुठिया घालावे.
आता ढवळू नये.
मग या मधल्या थरात केळी , कंद , सुरण व सर्व शेंगा व दाणे ( शिजवलेले ) घालून वरून सर्व मसाला व उरलेले मेथीचे गोळे घालावे.
आता त्यात गरम केलेल्यापैकी आधी तेल साधारणपणे ३ स्टील च्या डावा भरून घालावे व नंतर गरम पाणी घालावे.
साधारणपणे सर्वात वरच्या थराला जेमतेम दिसेल इतपतच पाणी घालावे.
मग घट्ट झाकण लावून मंद आचेवर पूर्णपणे १ तास ऊंधियु शिजू द्यावा. १ तासाने झाकण काढून लांब दांड्याच्या कालथ्याने खालपासून एकदा थोडं हलवून वाफ़ आली का ते तपासावे. परत झाकण ठेवून १५ मिनीटे शिजू द्यावे.

मग झाकण काढून नीट ढवळून वांगं , कांदा , बटाटा शिजला का ते बघून गरम गरम फ़ुलका आणि थंड ताकाबरोबर सर्व्ह करावे.