कच्चे मुर्ग की बिर्याणी

मास्टरशेफ संजीव कपूर ह्यांच्या खाना खजाना मध्ये ही पा़कृ पाहीली होती , तीच करुन बघीतली आणी इथे देत आहे :) साहित्य चिकन मुरवण्यासाठी: १/२ किलो साफ करून तुकडे केलेले चिकन २-३ टेस्पून आले+लसुण पेस्ट २ कप दही १ कप तळलेला कुरकुरीत कांदा १/२ कप बारीक चिरलेला पुदीना १/२ कप बारीक चिरलेली कोथिंबीर १ टीस्पून वेलचीपूड २ टीस्पून लाल तिखट १ १/२ टीस्पून गरम मसाला १ टेस्पून लिंबाचा रस १ हिरवी मिर्ची चिरून मीठ चवीनुसार १-२ टेस्पून तुप भातासाठी साहित्यः २ कप बासमती तांदुळ ३-४ तमालपत्र ४-५ लवंगा ४-५ काळीमिरी २ मसाला वेलची २-३ हिरवी वेलची ३-४ दालचिनी १ टीस्पून शहाजिरे मीठ चवीप्रमाणे (चिकनला की लावले आहे त्याअंदाजानुसार घालावे) इतर साहित्यः १/२ कप दुधात केशर मिसळलेले २ टेस्पून तुप थोडासा तळलेला कुरकुरीत कांदा थोडासा चिरलेला पुदीना थोडीशी बारीक चिरलेली कोथिंबीर कणीक पाकृ: चिकनला मॅरीनेट करण्यासाठी जे साहित्य सांगितले ते सर्व लावून चिकन ४-५ तास चांगले मुरु द्यावे. २ कप बासमती तांदूळ स्वच्छ धुवून कोमट पाण्यात २० मिनिटे भिजवणे. एका स्वच्छ रुमालात शहाजिरे सोडून वरील अख्खा गरम-मसाला बांधुन , बत्त्याने एक-दोनदा कुटून घेणे. नंतर ४ कप पाणी उकळ्ण्यास ठेवून त्यात मीठ, शहाजिरे व बांधलेली पुरचुंडे घालून भात अर्धवट शिजवून घेणे .(७०-८०% शिजवणे) शिजवलेला भात ताटात काढून गार होऊ द्यावा. एका नॉन-स्टीक भांड्याला तुपाचा हात फिरवून घेणे. त्यावर मुरलेले चिकन सर्वत्र पसरवणे. त्यावर अर्धवट शिजवलेला भाताचा थर लावणे. त्यावर तळलेला कांदा, चिरलेला पुदीना, चिरलेली कोथिंबीर, किंचित गरम-मसाला, किंचित वेलचीपूड भुरभुरणे. परत त्यावर अर्धवट शिजवलेला भाताचा थर लावणे व त्यावर चिरलेला पुदीना, चिरलेली कोथिंबीर, किंचित गरम-मसाला, किंचित वेलचीपूड भुरभुरणे. त्यावर केशर मिश्रीत दुध घालणे, तुप सोडणे. झाकण ठेवणे, झाकणाची कडा कण्केने व्यवस्थीत बंद करून ,भांडे तव्यावर ठेवावे. १५ मिनिटे मध्यम आचेवर शिजु द्यावे व १५-२० मिनिटे मंद आचेवर शिजु द्यावे.मंद आचेवर शिजवले की चिकन चांगले शिजते. आवडत्या रायत्यासोबत गरम-गरम सर्व्ह करणे.