दिपावली २०११ : आवाहन.

नमस्कार कलाकार मित्र मैत्रिणींनो! दिवाळी जवळ आली की पणत्या, आकाशदिवे, रांगोळ्या, भेटकार्डे अशा गोष्टीं नजरेसमोर येतात. लहानपणी फटाके उडवताना मजा वाटायची तर मोठे झाल्यावर तोच प्रकाश कॅमेर्‍यात बंद करायची हौस असते. ठिपक्यांच्या रांगोळीत रंग भरायला आवडत असते, पण त्याचे कौतुक घरातल्यांबरोबरच लांब राहणार्‍या मित्रमंडळींनीही करावे असे वाटत असते. शेजारच्या बंडू, पिंटूने किंवा सॅमी, पॅमीने किल्ला करताना विनोदी प्रसंग घडलेले असतात. कधी बाजारातली चकमक भूलवून टाकत असते तर कधी आई, आजीची लक्ष्मीपूजन करणारी सोज्वळ प्रतिमा आठवत असते. घरचा फराळ हा काहीजणांसाठी आठवणीतच राहिला असेल. तुमच्या घरी कोणकोणते पदार्थ केलेत? आजूबाजूचे दिवाळीचे वातावरण कसे आहे? कोणत्या आठवणी कॅमेर्‍यात बंदीस्त केल्यात ते आपल्या मिपा परिवाराला पाहू द्या. आपल्याकडे बरेच सदस्य हे हौशी फोटोग्राफर आहेत. त्यांनी (आणि इतरांनीही) छायाचित्रांचा खजिना उघडा केला तर त्याची मजा सगळ्यांना लुटता येईल. सर्वांना यात भाग घेता यावा म्हणून आपल्याला आवडलेली एक किंवा दोन छायाचित्रे आपण मिपावर चढवू शकता. धन्यवाद!