पनीर बटर मसाला

पियुशाची फर्माईश होती पनीर बटर मसाला ची पाकृ द्यायला....तीच देत आहे :) साहित्यः १०० ग्राम पनीर चे तुकडे हलक्या सोनेरी रंगावर शॅलो फ्राय करून घेणे. (तुम्हाला जर का तळायचे नसतील तर तुम्ही असेच वापरु शकता, तळले की चवीत फरक पडतो .) २ मध्यम कांदे उकडून घेणे व त्याची वाटून पेस्ट करणे. ३ मध्यम टोमॅटो उकडून घेणे व त्याची प्युरे करणे. ३ टेस्पून काजु गरम पाण्यात भिजवून त्याची घट्टसर पेस्ट करुन घेणे. १ टेस्पून आले+लसूण पेस्ट. ३ टेस्पून काश्मिरी लाल-मिरची पावडर. २ टेस्पून गरम-मसाला. १ टेस्पून धणेपूड. १/२ टेस्पून जीरेपूड. १ टीस्पून जीरे. १ टेस्पून कसूरी मेथी. मीठ चवीनुसार. ४-५ टेस्पून बटर. (आवडीप्रमाणे कमी-जास्त) २-३ तमालपत्र, १ मसाला वेलची, २-३ लवंगा, २-३ हिरवी वेलची. पाकृ: कढईत बटर गरम करुन घेणे व त्यात जीरे, २-३ तमालपत्र, १ मसाला वेलची, २-३ लवंगा, २-३ हिरवी वेलची घालून परतणे. त्यात आले+लसूण पेस्ट घालून चांगले परतणे. मग त्यात वाटलेली कांदे-पेस्ट घालणे. पेस्ट चांगली ब्राऊन परतली गेली पाहीजे. त्यात टोमॅटो प्युरे घालून एकत्र करणे. नीट एकजीव झाले की त्यात २-३ चमचे काजु-पेस्ट घालणे. (आपण ह्यात फ्रेश क्रिमचा वापर अजिबात करत नसल्यामुळे काजु-पेस्ट तुम्ही २-३ चमचे घालू शकता त्यामुळे ग्रेव्हीला क्रिमी टेक्सचर येईल.) आता त्यात काश्मिरी लाल-मिरची पावडर, गरम-मसाला, धणेपूड व जीरेपूड घालून एकत्र करणे. चवीप्रमाणे मीठ घालणे. त्यात आवश्यकतेनुसार पाणी घालून उकळी आणणे. उकळी आली की त्यात कसूरी मेथी चुरडून घालणे. त्यात आता तळून ठेवलेले पनीरचे तुकडे घालणे व झाकून ५-६ मिनिटे शिजवणे. ग्रेव्ही शिजली की त्यात वरून बटर सोडणे. गार्निशींग करता त्यावर थोडे पनीर किसून घालणे व थोडीशी कसूरी मेथी घालणे. (आवडत असल्यास थोडे फ्रेश क्रिम ही घालू शकता.) पनीर बटर मसाला तुम्ही नान, रोटी बरोबर सर्व्ह करु शकता....मग वाट कसली बघता येताय ना जेवायला :)