स्ट्रॉबेरी फ्रीज कशी करावी? साठवून ठेवावी?

(How to freeze Strawberry?) थोडे दिवसांपूर्वी स्ट्रॉबेरी पिकिंगला जायचा योग आला. खूप मजा आली. आणि खूप सार्‍या फ्रेश, सुंदर, लालचुटूक स्ट्रॉबेरी घरी आल्या. आल्या आल्या स्ट्रॉबेरीने भरलेली छोटी टोपली फ्रीजमध्ये ठेवली. मग दुसरे दिवशीपासून विचार सुरू झाला की इतक्या सार्‍या स्ट्रॉबेरीजचे करायचे काय? केकमध्ये घालाव्यात की जॅम करावा की शेक करावा की आणखी काय करावे. मग नेटवर जरा शोधाशोध केल्यावर स्ट्रॉबेरी साठवून ठेवायचे मार्ग सापडले. त्यातला सगळ्यात सोपा मार्ग भावला :-D त्यानुसार स्ट्रॉबेरी फ्रीज करायचे ठरवले.मग थोडे R&D करून स्ट्रॉबेरी फ्रीज केल्या. काम फत्ते. :-) मी जी वापरली तीच साधी सोपी पद्धत इथे देत आहे. १) स्ट्रॉबेरीच्या सिझन मध्ये फ्रेश स्ट्रॉबेरी, फार्मवरून स्वतः तोडून आणावी किंवा दुकानातून विकत आणावी. २) आणल्यावर लगेच साठवून ठेवायची नसेल तर मग ती फ्रीजमध्ये झाकण न ठेवता (uncovered) ठेवावी. पण आणल्यानंतर शक्यतो १-२ दिवसात स्ट्रॉबेरी फ्रीज करावी. 3) जेव्हा स्ट्रॉबेरी गोठवून ठेवायची असेल तेव्हा ती फ्रीजमधून काढावी. चाळणीत मध्ये घालून नळाच्या वाहत्या पाण्यामध्ये हलक्या हातानी (देठासकट) धुवून घ्यावी. ४) आता एका ट्रेमध्ये बटर पेपर/ प्लास्टिक / पार्चमेंट पेपर पसरून ठेवा. आता स्ट्रॉबेरीची देठं हातानी काढा किंवा एका कटिंग बोर्डवर स्ट्रॉबेरी ठेवून सुरीने त्याची देठं कापा. ५) नंतर ती ५ मिनिटं किचन टॉवेलवर(टिश्यू पेपरवर) ठेवून निथळू द्यावी. मग कोरड्या किचन टॉवेलने स्ट्रॉबेरी हलकेच पुसून घ्या. टिश्यू पेपर स्ट्रॉबेरीला चिकटणार नाही याची काळजी घ्या. ६) ह्या देठं काढलेल्या स्ट्रॉबेरी आता ट्रेमध्ये ओळीने थोडे थोडे अंतर ठेवून ठेवा. हा ट्रे फ्रीजरमध्ये २४ तास ठेवा. ७) २४ तासांनी फ्रोजन स्ट्रॉबेरी तयार. आता हेवी ड्यूटी फ्रीजर बॅग किंवा प्लास्टिक/ग्लास फ्रीजर कंटेनरवर मार्करने स्ट्रॉबेरी असं नाव आणि पॅकिंग डेट, एक्सपायरी डेट लिहून त्या बॅग/कंटेनर मध्ये ह्या फ्रोजन स्ट्रॉबेरी ठेवा. (फ्रोजन स्ट्रॉबेरी साधारण सहा महिने टिकतात, त्यानुसार एक्सपायरी डेट लिहा) ८) फ्रिजर बॅगमध्ये स्ट्रॉबेरी ठेवताना प्रथम त्यात स्ट्रॉबेरी भरून मग त्यातली हवा काढून झिपलॉक स्लाइडर शेवटचा एक इंच सोडून लावायचा. मग परत त्यातली उरलेली हवा काढून स्लाइडर पुढे नेऊन फ्रीजर बॅग पूर्ण सील करा आणि फ्रीजरमध्ये ठेवा. ९) फ्रीजर बॅग/ कंटेनर मध्ये स्ट्रॉबेरी ठेवताना एकाच मोठ्या कंटेनरमध्ये स्ट्रॉबेरी ठेवण्याऐवजी छोट्या छोट्या फ्रीजर बॅग्ज/ कंटेनर मध्ये ठेवा. म्हणजे गरज पडेल तेव्हा एकच कंटेनर उघडला जाईल व बाकीच्या स्ट्रॉबेरी आहे तशा ठेवल्या जातील आणि म्हणून जास्त टिकतील. १०) जेव्हा ह्या फ्रोजन स्ट्रॉबेरी वापरायच्या असतील तेव्हा हव्या तेवढ्या स्ट्रॉबेरी पॅकमधून काढून फ्रीजबाहेर ठेवा. थोड्य नरम झाल्या की वापरा. या फ्रोजन स्ट्रॉबेरी, स्ट्रॉबेरी शेक/स्मूदी, स्ट्रॉबेरी जॅम/स्प्रेड/आईसक्रीम वगैरे बनवायला वापरता येतील.