धूळ - एक आठवण !!!

धूळ - एक आठवण !!! खोली नवी करण्याचा अट्टाहास धरलाय , किती दिवस झाले खटाटोप चाललाय , जुन्या गोष्टींची जागा नव्यांनी घ्यायला हवी .... सगळ्या कोपऱ्यातली धूळ आता झटकायला हवी ...!!! वेगळे रंग घेऊन नवे पडदे सजले , नवा उजळपणा घेऊन कार्पेटहि आले , स्टाईल पण बदलली आहे खोलीची साजेशी .... तरी.... एका कोपऱ्यात अजूनही धूळ आहे जराशी ..!! हितचिंतक बरेचसे येउन गेले , बदलांचे कौतुक व सुधारणाही सांगून गेले , हसऱ्या चेहऱ्याने सगळे क्षण साधून घेतले .... बरे ...त्या धुळी कडे कुणाचे लक्ष नाही गेले ...!!! झटकण्याच्या प्रयत्नात डोळे चिंब होत आहेत , पाणी शिम्पडुनहि जखमाच ओल्या होत आहेत , दुर्लक्षित केली तरी नव्याने खपली निघत आहे ... ही कोपऱ्यातली धूळ फार त्रास देत आहे ...!! मुखवटा घालून मी नव्याने हसते आहे , पाणावलेले डोळे माझे की ती पुसते आहे , आता नव्या खोलीत अनोळखी मीच ... आणि जुन्या कोपऱ्यात ओळखीची तीच ...!!!!