ढोकळा

ढोकळ्याच्या अनेक रेसिप्या यापूर्वी येऊन गेल्या आहेत, पण ही एका गुज्जु मैतरिणीची बिनताकाची ही रेसिपी थोडी वेगळी वाटली म्हणून तुम्हा सर्वांसाठी-
साहित्य- नेहमीचेच.. डाळीचे पीठ(बेसन) साधारण कपभर, २ चहाचे चमचे रवा,
पाऊण ते १ चमचा खायचा सोडा,
१/२ चमचा धणे खरगटून, १-२ हिरव्या मिरच्या + पेरभर आलं भरड वाटून्,
साखर,लिंबू,मीठ,तेल,मोहरी,हिंग,खोबरे,कोथिंबिर

कृती-
अर्ध्या लिंबाचे २ चमचे साखर घालून पेलाभर सरबत बनवून घ्या.
त्यात मावेल एवढे बेसन घाला आणि ढोकळ्याच्या पीठाला भिजवतो तितपर सरसरीत कालवा.साधारण कपभर पीठ लागते.
त्यात २चमचे रवा, खरगटलेले धने १/२ चमचा, १ चमचा तेल,१चमचा आलं मिरचीचे वाटण घाला. चव बघून वाटल्यास थोडे मीठ घाला.
एका पसरट पॅनमध्ये पाणी उकळत ठेवा. एका थाळीला तेलाचा हात लावून घ्या.
पाणी चांगले उकळले की ढोकळ्याच्या मिश्रणात खायचा सोडा घाला व फेटून घ्या. मिश्रण फसफसताना दिसले की थाळीत ओता आणि पॅन मध्ये वाफवायला ठेवा.
वर घट्ट झाकण ठेवा.ह्या झाकणाला पंचाने घट्ट बांधा म्हणजे वाफेचे पाणी त्यात शोषून घेतले जाईल व ढोकळ्यावर पडणार नाही- (ही चकलीची सुचवणी)
साधारण १५ मिनिटे मध्यम आचेवर वाफवा, नंतर आच बंद करा व २ मिनिटे तसेच राहू द्या. नंतर थाळी बाहेर काढा. गार झाला की वड्या पाडा.
ढोकळा वाफवत ठेवला की एकीकडे २ टेबल स्पून तेल तापवा, त्यात चमचाभर मोहरी,घाला. ती तडतडली की हिंग घाला. फोडणी गार झाली की त्यात एक चमचा साखर + १ चमचा लिंबाचा रस यांचे मिश्रण घाला.
ढोकळ्यावर ही फोडणी ओता, ओले खोबरे व कोथिंबिरीने सजवा.