मॅगी नूडल्सः कसं असेल कमबॅक..? डोकं लढवा

नमस्कार मंडळी, नेहमीच्या काथ्याकूटांच्या लढायांतून वेळ काढूया (हे मी स्वतःला बजावतोय, गैरसमज नको ;-) ). आणि काहीतरी धमाल आणि डोकेबाज करण्याचा प्रयत्न करूया. मॅगीवरील बंदी माननीय न्यायालयाने उठवली आहे. खटला अजून संपला नाही पण आतापर्यंत उपलब्ध बातमी नुसार मॅगी परत विक्रीस येणार आहे असं खात्रीलायक वाटत आहे. ह्या सगळ्या परिस्थितीत जाहिरात जगतात एक कुतूहल लागून राहलंय की मॅगीचं पुनरागमन नक्की कसं असेल? काय करतील नेस्ले आणि त्यांचे ब्रँड मॅनेजर? नुसता जाहिरातींचा मारा करून प्रश्न सुटणार नाही. त्यांना काहीतरी ठोस आणि मौल्यवान असा संदेश द्यायला लागेल. "वी आर सेफ - आमचं उत्पादन सुरक्षित आहे" असं म्हणून चालणार नाही. कारण फक्त 'भूक भागवणे' ह्या अतिशय बेसिक विचारापासून आजची अन्नपदार्थ-उत्पादने पार पुढे जाऊन 'हेल्दी' म्हणजे 'आरोग्यदायी' आहोत असा (तद्दन खोटा) प्रचार करत आहेत. या परिस्थितीत 'खायला सुरक्षित' अशी प्रतिमा जास्त नुकसान करणारी आणि शंभर युगं मागं ढकलणारी ठरेल. सेलीब्रीटी वापरून उपयोग नाही कारण आधीच त्यांच्या विश्वासार्हतेवर प्रश्नचिन्ह आहे. मॅगीचे पुनरागमन कोक आणि कॅडबरीइतके सोपे कधीच नसणार कारण हे उत्पादन समाजाच्या सर्व स्तरांमधे, वर्गांमधे सारखेच लोकप्रिय होते. त्याचा एक लाइफस्टाइल प्रॉडक्ट पेक्षा जीवनावश्यक वस्तू म्हणून वापर होता. त्यामुळे आता फारच जपून पावलं टाकावी लागणार आहेत. मॅगीने काहीही कॅम्पेन केलं तरी प्रतिस्पर्धी -सन्फिस्ट, चिंग्स, आयटीसी, इत्यादी- त्याची हवा काढायला टपलेलेच असणार. आपल्या जाहिरातींमधून त्यांच्या टिकाटिप्पणीला खाद्य मिळू नये अशीही काळजी घ्यायला लागणार. मित्रांनो, एका जाहिराततज्ञासाठी ही एक खरंच आव्हानात्मक परिस्थिती आहे. तसंच कल्पक डोक्याच्या लोकांसाठी पुरेपूर खाद्य आहे. मॅगी अनेकांच्या जीवाभावाची आहे. तर अशा मॅगीसाठी जाहिरात मोहिम काय असावी यावर आपल्याला काथ्याकूट करायचा आहे. ब्रँडबद्दल तुम्हाला माहिती आहे, त्याच्या समस्येबद्दलही माहिती झालेच आहे. जाहिरात कंपन्या ज्याप्रकारे काम करतात त्यातला ५०% टक्के भाग तुमच्या हातात आलेला आहे. आता हा प्रश्न सोडवायचा आहे. तर येऊद्या एकएक भन्नाट कल्पना. वेळोवेळी जाहिरात एजंसी व नेस्ले तुमच्या कल्पनेवर कशी प्रतिक्रिया देऊ शकतात याचे मार्गदर्शन मी करेन. त्यासोबतच काही कल्पना राबवतांना येणारे अडथळे आणि समस्याही मांडेन. म्हणजे जाहिरात एजंसीचे कार्य कसे चालते हेही आपल्याला लक्षात येइल. मनोरंजन + माहिती असा दुहेरी उद्देश आहे या धाग्याचा. तुम्हाला काय करायचंयः १. ग्राहक दृष्टिकोणासंबंधी टिप्प्णी देऊ शकता. उदा. मुलांना मॅगी देण्याची आयांची वेळ साधारण दुपारनंतरची असते. भारतीयांना गोर्‍या रंगाबद्दल अवास्तव आकर्षण आहे. खेळतांना अचानक थकवा जाणवायला लागल्यावर काहीतरी पेय प्यावेसे वाटते. २. सिंगल लाइन नॅरेटीव - एका वाक्यात स्पष्ट होणारे धोरण, विचार - देऊ शकता. उदा. फेअरअँडलवलीने उजळपणा येतो, बूस्ट प्यायल्याने मरगळ झटकून अचानक शक्ती येते, ३. प्रत्यक्ष जाहिरात - टीवी कमर्शीयल किंवा इतर कोणतेही पारंपरिक माध्यम - कशी असेल त्याची स्क्रिप्ट - पटकथा लिहू शकता. उदा.: मेलोडी इतनी चॉकलेटी क्युं है असं विचारणारे वेगवेगळे प्रसंग लिहिणे, कोकच्या थंडा मतलब कोकाकोला हे दाखवणारे प्रसंग लिहिणे, ४. पारंपरिक माध्यमांशिवाय लोकांमधे जनजागृती करण्याचे नवीन फंडे सांगू शकता. उदा. महिन्द्रा त्यांच्या स्कॉर्पीओ आणि तत्सम एसयुव्ही चा दमदारपण व उपयुक्तता पटवून देण्यासाठी मोटरशोजमधे कृत्रीम ऑफरोड ट्रॅक तयार करून लोकांना प्रत्यक्ष टेस्ट ड्राइव देतात. ५. एखाद्या सदस्याने सादर केलेली कल्पना प्रतिस्पर्धी कंपनी कशा पद्धतीने हाताळेल याचीही कल्पन देऊ शकता. उदा.: जॅग्वारने मर्सिडीजच्या कोंबडीची काढलेली पिसं. त्यावर मर्सीडीजचे उत्तर. मग करताय ना मदत मॅगीला परतायला...? (हो. दिस्क्लेमर राहिलेच. : ही कुठल्याही पद्धतीने मॅगीची जाहिरात नाहीये. मिपा किंवा संदीप डांगे ही व्यक्ती कुठल्याही प्रकारे मॅगीशी संबंधीत नाही. हा फक्त मनोरंजनासाठी (ब्रेनस्टॉर्मींग-रोलप्ले) साठी काढलेला धागा आहे. मार्केटींग नाही. इच्छुक या धाग्यावर बिन्दास्त मॅगीची पिसंही काढू शकतात.)