उन्हाळा आणि भटकंती...

उन्हाळा आणि भटकंती... हे समीकरण अनेकांना ऑड वाटते, पण मित्रांनो उन्हाळ्यातही तुम्ही अगदी मनसोक्त भटकंती करू शकता उन्हाळा हा भटकंतीसाठी तसा खडतरच ऋतू म्हणायला हरकत नाही. पण हाडाच्या ट्रेकर्सना दुर्गभ्रमंती करण्यासाठी खरं तर कुठलीही वेळ आणि ऋतू आडवा येत नसतो.पाठीवर सॅक अडकवून द-या-खो-यांत, डोंगर शिखरावर, गड-किल्ल्यांवर, रानावनात, अभयारण्ये-जंगलात आपला आनंद शोधत फिरत असतात. यासाठी या भटक्यांना कोणतीही काळवेळ आडवी येत नाही. अमावस्येची काळी गडद छाया पांघरलेली रात्र असो वा पौर्णिमेचं पिठुर चांदणं अस पण डोक्यावर रखरखतं ऊन, अंगाची होणारी लाही-लाही, गडकिल्ल्यांवर असणारं पाण्याचं दुर्भिक्ष यामुळे बरेच भटके या ऋतूत गडकिल्ल्यांपासून काहीसे दूरच राहतात पण माझ्यासारखे काही जण चांदण्या रात्रीतले छोटे-छोटे ट्रेक आखून या दिवसातही ट्रेकिंग चा आनंद लुटत असतात. तसा या उन्हाळ्यातही उन्हाचा त्रास टाळण्यासाठी मस्त "मूनलाइट ट्रेक' करता येतो, रात्रीच्या या ट्रेक्सचीही एक वेगळीच मजा आहे. फक्त यावेळी निशाचरांपासून सांभाळून राहावं लागतं. गडकिल्ल्यांच्या प्रेमात पडलेल्या कोणत्याही भटक्याची भटकंतीची इच्छा ती कुठल्याही ऋतूतली, अपुरी राहणारच नाही असा हा सारा सह्याद्रीचा आसमंत आहे. म्हणूनच सह्याद्रीच्या अरण्यात लपलेले काही वनदुर्ग आपल्याला ऐन उन्हाळी वातावरणातदेखील वेगळाच थरारक अनुभव देऊन जातात.

नाइट ट्रेकची मजा म्हणजे जणू मूनलाइट सफरच. शांत-निवांत वेळ, गूढरम्य वातावरण, दोस्त मंडळींची सोबत अन्‌ आपले आवडते ठिकाण, यापेक्षा बेस्ट आणखी काय असू शकते? खगोलशास्त्राचा अभ्यास करणारा दोस्त सोबत असेल तर रात्रीच्या आकाश आणि ताऱ्यांच्या स्थितीची माहितीही तुम्हाला मिळून जाते. इतिहासातला एकच विषय घेऊन रंगणाऱ्या गप्पांमध्ये केव्हा पहाटेचा गारवा जाणवू लागतो, ते लक्षातच येत नाही. पहाटेचा सूर्योदय त्या ठिकाणाहून पाहण्याचा आनंदही आगळाच. या गप्पांतूनच तुम्हाला खूप काही नवी माहिती मिळते अन्‌ तुमच्या जाणिवा प्रगल्भ होत जातात. मित्रांनो, निसर्ग नेहमीच तुम्हाला शिकवत असतो. प्रत्येक पानाफुलातून, कीटकांच्या हालचालींतून, दिवस-रात्रीच्या चक्रातून अन्‌ अशा अनेक प्रकारांतून तो आपल्याशी बोलत असतो. तेव्हा त्याच्याशी संवादाची संधी दवडू नका.मग चला अशाच आपणही निरार्गाशी संवाद सादुयात "लेटस चॅट विथ हिम''.