मी अजिबात घाबरत नाही....

डिस्क्लेमर : हा धागा मुद्दाम काथ्या कुटायला काढला आहे.न घाबरणार्‍या लोकांनी, घाबरणार्‍या लोकांसाठी, न घाबरता काढलेला काथ्याकूट धागा.... हिंदी सिनेमे बघायला मी अजिबात घाबरत नाही, पण ते १९८०च्या पुर्वी असतील ह्याची मात्र खात्री करतो. मिपावर तासन-तास पडीक रहायला मी अजिबात घाबरत नाही. पण घरातली सगळी कामे करायला कुणी तरी आहे ना, ह्याची मात्र खात्री करून घेतो. बायकोच्या हातचा चहा प्यायला मी अजिबात घाबरत नाही. पण त्या चहाला आल्याचा स्वाद आहे ना, हे मात्र एक घोट घेवून बघतो. केरसूणीने झूरळ मारायला मी अजिबात घाबरत नाही, बायकोपुढे शौर्य गाजवायला तेवढाच एक चानस असतो. मित्रांबरोबर बियर प्यायला मी अजिबात घाबरत नाही. पण त्याआधी बायको महिलामंडळात त्या आठवड्यात जावून आली आहे का, हे परत एकदा आठवून बघतो. मोबाईलवर येणारे काही फोन घ्यायला मी घाबरत नाही. पण त्याआधी आपल्याकडे फावला वेळ बराच आहे ना, ह्याची पण खात्री करून घेतो. स्वैपाकघरांत पदार्थ बनवायला मी घाबरत नाही. पण त्याआधी मी सगळे जिन्नस घरात आहेत का, हे मात्र नजरेखालून घालतो. कुणालाही भेटतांना मी घाबरत नाही पण त्याआधी त्या व्यक्तीला शिंगे नाहीत ना, हे मात्र बघून घेतो. चित्रे काढायला मी घाबरत नाही. आणि लगेच ते चित्र फाडून टाकायला पण घाबरत नाही. मिपावर पहिला प्रतिसाद द्यायला मी घाबरत नाही. पण त्याआधी आय.डी. बॅन झाला तर दुसरा आय.डी. काढायचा बेत नक्की करतो. मिपावर धागे काढायला आणि जिलब्या पाडायला मी घाबरत नाही. पण त्याआधी मी डायरी मात्र आणून ठेवतो. तसा मी अज्जून बर्‍याच गोष्टींना घाबरत नाही. पण बायको-मुलांच्या अपरोक्षच कॅमेराला हात लावायला लागतो. दंतवैद्याकडे जायला मी अजिबात घाबरत नाही पण त्याआधी घरात आइसक्रीम मात्र नक्कीच आणून ठेवतो.