Holiday मेंबरशिप कंपन्यांबद्दल माहिती हवी आहे

माझे एक स्नेही ह्यात जाम वैतागलेत ....

एकंदरीतच या Holidays membership विषयी चांगले मत नाही. अश्या भरपूर कंपन्या आहेत. फिरण्याची आवड ही चांगलीच आहे. पण इथे उद्याचा भरवसा नाही आणि पंचवीस वर्षाच्या चैनीचे नियोजन का करायचे ह्याचा विचार करावा (ईश्वर आपणास उदंड आयुष्य देवो). एखाद्या चांगल्या प्रवासी कंपनी कडून प्रत्येक ट्रीप करावी वेगवेगळी. पंचवीस वर्षाचे पैसे भरून जर आपण फक्त पंधराच वर्षे जावू शकलो तर दहा वर्षाचे पैसे वाया जातात. membership मुलाबाळांना ट्रान्स्फर करता येते वगैरे भूलथापांना बळी पडू नका. त्यातल्या त्यात केसरी/ वीणा वर्ल्ड (नक्की आठवत नाही) ची 'पाच वर्ष ,पाच खंड,पन्नास देश' अशी कल्पना वाचली होती. चौकशी करून बघा.

विषयी फार कल्पना नाही. साधारणत: ही रिसोर्ट मुख्य गावापासून लांब असतात त्यामुळे रिसोर्टमधे जेवणावाचून पर्याय नसतो आणि ते महाग असत.मेंबर डिस्काउंट धरुन. बाहेर फिरणे महाग होते. सिझनमधे बुकींग मिळायसा त्रास होतो. दरवर्षी काही फी भरावी लागते २५ वर्षाचे पैसे भरल्यानंतरही. सर्वात मोठा फायदा म्हणजे तुम्ही ठरवून फिरायला जाता न चुकता. तसेच तुमच्या कार्डवर कुटुंबातले इतर जाउ शकतात. तसे क्लब महिंद्रा, RCI ह्सा पण संस्था आहे.

आमच्या एका नातेवाईकांनी या नाही पण दुसर्‍या प्रकारात २५ वर्षांसाठी पैसे भरलेत व त्यांच्या असलेल्या लिमिटेशन्ससकट ते सारखे फिरत असतात. ठिकाण अगदी गैरसोयिचे असले तर नाही जात, अन्यथा ते विचित्र ठिकाणांना भेटी देत असतात. (मला फिरायची आवड नसल्याने सग्ळी ठिकाणे विचित्र वाटू शकतात याची नोंद घ्यावी.)

प्रतीसादासाठी धन्यवाद अत्रन्गि पाउस : तुम्हाला व तुमच्या स्नेह्यांना चालु शकत असेल तर तुमच्या स्नेह्यांचा संपर्क क्रमांक मिळेल काय? चिनार, तुमचा मुद्दा कळला, आणि काहिसा पटला म्ह्णुन "त्यातल्या त्यात केसरी/ वीणा वर्ल्ड (नक्की आठवत नाही) ची 'पाच वर्ष ,पाच खंड,पन्नास देश' अशी कल्पना वाचली होती." ची चौकशी केली. ही खूप महाग आहे हो (२५,००,००० रुपये माणशी!!!!) आणि आधी भारत फिरुन घेउ मग विदेश असा विचार आहे. मित्रहो, अन् रेवती ताई, "सर्वात मोठा फायदा म्हणजे तुम्ही ठरवून फिरायला जाता न चुकता" हेच ध्येय समोर ठेवुन प्लानिंग चालु आहे.

अश्या स्कीम्समध्ये पैसे गुंतवल्याने स्कीमवाल्यांच्या मर्जीप्रमाणे आपले वेळापत्रक आखण्यात व त्यांच्या नियमांबरोबर जबरदस्तीने फरपटत जग बघण्यात "फिरण्याचा आनंद कमी आणि त्यांचे-आपले समीकरण जमविण्याचा मनस्ताप जास्त" असे होऊ शकते. शिवाय, बर्‍याचदा, प्रत्येक ठिकाणच्या त्यांच्या जागा ठराविक संखेच्या असल्याने... अ) ऐनवेळी बुक करायला गेल्यास नकाराची बरीच शक्यता असते व बेत बदलून बुकींग मिळेल तिथे दुसरीकडे जावे लागते अथवा आ) खूप अगोदर बुक करून ऐनवेळेस तुमचा बेत बदलल्यास होणारे नुकसान पत्करावे लागते. त्यापेक्षा, अश्या स्कीम्समध्ये जेवढे पैसे (मूळ फी + इतर सर्व छुपे खर्च) गुंतवावे लागतात तेवढे एखाद्या सुरक्षीत गुंतवणूकीत टाका. त्यावर येणारे व्याज व मुद्दल्लाचा ठराविक भाग तुमच्या दर सहलीकरीता काढून घेऊन तुमच्या मर्जीच्या वेळेस व तुमच्या मर्जीच्या ठिकाणच्या (स्वतः किंवा एखाद्या सहलकंपनीबरोबर) सहलीचा आनंद घ्या.

धाग्यात व प्रतिसादात थेट कंपनीचे नाव घेतल्याने मिसळपाव.कॉम ला कायदेशीर अडचण येऊ नये म्हणून थेट नाव हटवून :हॉलिडे शेअरिंग कंपनी: असे बदल करावे. ह्या सगळ्या कंपन्या इथून तिथून नाव बदलून सारख्याच त्यामुळे फरक पडत नाही.

परवा ठाण्याला विवियाना मॉलात शिनेमा बघताना लकी डृऑ लागला. दुसर्‍या दुवशी बक्षिस घ्यायला बोलावले. दीड लाख रु फीची एक हॉलिडे मेंबर्शिपची स्कीम सांगितली . म्या न्हाय बोललो. मग हळु हळु कमी कमी करत एक लाखावर गाडी आली. म्या न्हाय बोललो. मग पाच वर्षाचे पन्नास हजाराचे बिग बझारचे कुपन्स फ्री असे बोलला. मी बोल्लो सगळे कुपन्स एकदम दे. मी घेतो. तो न्हाय बोलला... एकेकच कुपन महिन्याला मिळणार बोलला. ....... शेवटी फूल ना फुलाची पाकळी म्हणुन चार फुकट गिफ्ट मिळाल्या. त्या मात्र घेऊन आलो एक चांदीचे नाणे १०००० चे सोने डिस्काउंट कुपन. ( पन्नास हजारावर दहा हजार सूट.. मी व हफिसातला एक मित्र दोघे मिळुन ते वापरणार ) एक बाउल सेट ... गुरुवारी शिरा व शुक्रवारी षीरखुर्मा खायला. आणि सात दिवस गोवा ट्रिप फ्री ! एक वर्षाची वॅलिडिटी आहे. जाऊ एक दिवस निवांत . ........

मायबोलीवर शोधा बरेच धागे येऊन गेलेत.इथून तिथून कुठूनही गुगलूनही माहिती अनुभव मिळाल्याशी मतलब.या कंपन्यानी मोठ्या कार्पोरेटला प्लान विकलेत तिथे त्यांचे लोक येऊन राहातात आता वैयक्तिक गिह्राइकं शोधताताहेत.

ते थम्सप करणारा गस्टल काय? हसूच येते राव त्याला बघीतल्याबरोबर

तीनेक वर्षांपूर्वी उत्साहाच्या भरात आम्हीपण अशा एका स्कीमची मेंबरशीप घेतली होती. पण नंतर त्याचे तोटे समजून आल्यानंतर ’फ्री लूकअप’ काळात परत केली. घाईघाईने अशी मेंबरशीप घेतली खरी. पण ही कंपनी कशी गंडवते याच्या अनेक कहाण्या दोन दिवसात कळल्या.एकतर यांचे रिझॉर्ट तीन-चार महिने आधी बुकींग केल्याशिवाय मिळत नाहीत आणि पर्यटनाच्या हंगामात त्यापेक्षाही आधी बुकींग करावे लागते. काही ठिकाणी स्थानिक रिझॉर्टवाले मेंबरना रूम न देता पैसे घेऊन परस्पर बाहेरच्यांना रूम देतात असेही कळले. तसेच पॅकेजमध्ये रूमचे भाडे (आणि मला वाटते दिवसाला १००० रूपयांचे खाणे) समाविष्ट आहे. असे कळले की यांच्या रिझॉर्टमध्ये खाण्याचे दर भरमसाठ लावले जातात त्यामुळे दिवसाला हजार रूपये तर कुठेच पुरत नाहीत. यांची अनेक रिझॉर्टही तशी दूर आहेत म्हणजे जेवायला बाहेर जाऊन यावे असे म्हटले तर ते तितकेही सोपे नाही. या सगळ्या गोष्टींचा विचार करता अशी मेंबरशीप चालू ठेवण्यात काही अर्थ नाही हे समजले. आणि दुसरे म्हणजे यांची मेंबरशीप एकदा घेतली तर त्यांच्याच हॉटेल आणि रिझॉर्टमध्ये राहणे भाग पडणार. त्यापेक्षा आपण आपल्याला पाहिजे तिथे, पाहिजे त्या वेळी आणि पाहिजे त्या ठिकाणी गेलेले कधीही चांगले.

या थापांना बळी पडू नका. सीझनमध्ये कधीही बुकिंग मिळत नाही. उन्हाळ्यात राजस्थान, पावसाळ्यात आसाम आणि हिवाळ्यात काश्मीर अशा "सहली" गळ्यात पडतील. आणि पैसे आधीच भरलेले असल्यामुळे नाईलाजाने जावेही लागेल.

वाचले ना पैसे? घाला एक स्पॅानसॅार कट्टा.

आपली आपण ट्रिप प्लान करण्याची पण एक मजा असते. आणि शिवाय आपल्या सोयीनुसार, हवं तिथे-हवं तितकं रहाता येतं. मला स्वतःला भलत्याच लोकांसोबत एका बसमध्ये गाईडच्या सांगण्यानुसरा फिरायला आवडत नाही. म्हणुन शक्य तिथे मला ट्रिप प्लान करायलाच आवडते. कधी करुन पहा, अशक्य स्वस्तात आपण उत्तम ट्रिप प्लान करु शकतो. कशाला नादी लागयचं असल्या कंपन्यांच्या..

तो काय पैसे वाचु दे कि नाही या वर थोडीच अवलंबुन आहे!!! ठरवा कट्टा पुण्यात! करु की स्पॅानसॅार :) बाकी membership चा अजुन ठरवलं नाही, पण तुम्च्या सगळ्यांच्या अनुभवावरुन नादी न लागलेलच बर...

माझं मत: अशी मेंबरशिप न घेणे श्रेयस्कर! आपले बरेच पैसे अडकून पडतात. फिरायला जाण्यात बर्याच मर्यादा येतात. जिथे अशा कंपनीचे हॉटेल आहे अशाच ठिकाणे फिरायला जावे लागते. अशा मेंबरशिपचे वर्षाचे मेंटेनन्स चार्जेस वेगळे असतात आणि ते वाढण्याची शक्यता असते. आणि मुळात येवढे पैसे भरल्यामुळे वाढीव मेंटेनन्स भरावा लागतो. मेंबरशिप रद्द करण्याची प्रोसेस स्पष्ट नसते. त्यातून किती आणि केव्हा पैसे परत मिळतील याची शाश्वती नसते. दर वर्षी फिरायला जाणे जमेलच असेही नाही. अशा कंपनीला मात्र आपण नियमित पैसे भरतच असतो. त्यामुळे कंपनीचा नफा सुरूच राहतो. अशा मेंबरशिपमध्ये फक्त राहण्याचे पैसे वाचतात. पण कर, सर्विस चार्जेस, वगैरे भरावेच लागतात. व्यवस्थित नियोजन करून फिरायला गेल्यास राहण्यावर अगदी फार पैसे खर्च होतात असे नाही. म्हणजे मेंबर्शिप कंपनीच्या माध्यमातून जाणे आणि स्वतंत्र जाणे यात पैशाची अशी काही फार मोठी बचत होत नाही. नाहीतरी कंपनीला दिलेल्या पैशावर मिळालेल्या व्याजातून हा फरक भरून निघतोच. मग कशाला उगीच कंपनीचे खिशे भरून मनस्ताप विकत घ्यायचा? त्यापेक्षा स्वतंत्रपणे आपल्याला आवडेल तिथे आणि तितके दिवस मनसोक्त फिरा आणि ताणविरहित आनंद लुटा. अर्थात हे माझे वैयक्तिक मत!

मला काही वर्षांपुर्वी एका कंपनीने अश्या स्कीमसाठी गळ घातली होती. मी बर्‍यापैकी गळाला लागलोदेखील होतो. पण मग स्कीमचा नीट विचार केल्यावर नाही म्हणालो. स्कीम काहिशी अशी होती: १. ३००००० रुपये भरुन २५ वर्षाची मेंबर्शिप मिळणार. २. दर वर्षी १०,००० रुपये ए एम सी म्हणुन भरायचे ३. वर्षातुन ७ दिवस आवडीच्या रिसोर्ट मध्ये रहता येइल (उपलब्धतेनुसार) ४. मेंबरशिप दुसर्‍या क्रमांकाच्या उतरणीची होती (एकुण ४ क्लास. ४ थ्या क्लास ची मेंबरशिप असेल तर भर उन्हाळ्यात जागा मिळाली तर राजस्थानच्या रिसोर्टचे बुकिंग मिळु शकते). सेल्समनच्या मते या क्लास मध्ये बुकिंग मिळणे अवघड नसते (फक्त जोडुन सुट्ट्या आल्या तर अवघड जाते असे म्हणाला. त्याचा अर्थ जोडुन सुट्ट्ञा आल्या तर ढगात जा असा मी घेतला). रिसोर्ट खरोखर अप्रतिम होती / असतात (हे बळी गेलेल्या बकर्‍यांकडुन कळाले आहे). मी साधे गणित मांडले: १. २५ वर्षासाठी ३ लाख म्हणजे एका वर्षासाठी १२ हजार. अधिक प्रत्येक वर्षाचे १०,०००. अधिक ३ लाखाचे व्याज (मी बँकेत ठेउन १०% मिळणार असे गृहीत धरले). म्हणजे ३०,०००. म्हणजे एकुण खर्च ५२००० वर्षाला. २. ७ दिवसाचे बुकिंग फ्री हे धरुन प्रत्येक दिवसाचा खर्च ७,५०० जात होता. एवढे करुन बुकिंग पाहिजे तेव्हा मिळेलच याची खात्री नाही. ३. अतिशय चांगल्या रिसोर्ट मध्ये आजही खोलीचा दर ७००० च्या आसपास आहे (३ वर्षापुर्वी तो अजुनच कमी होता). म्हणजे वर्षाला ४९००० पेक्षा खर्च येणार नाही (त्यावेळेस साधारण ३५,००० आला असता). याच्यावर त्याने प्रतिवाद केला की हा खर्च दर वर्षी वाढत जाणार म्हणजे आज ज्याच्यासाठी ३५ हजार खर्च येतो त्याच्यासाठी २५ वर्षाने हा कैकपट असेल. हा प्रतिवाद मला पटला. तसे बघता ते ३ वर्षात सिद्ध झाले. आज साधारण ४९ हजार खर्च येइल. अजुन काही वर्षानी वाढेल. ४. मी माझ्यापुरते गणित मांडले की मी महाबळेश्वरला रामसुख रिसोर्ट सारख्या उत्तम हॉटेलात राहिलो तरी यापेक्षा कमे खर्चात सर्व खाणे पिणे धरुन कमी खर्च येतो. मग मी एका ठराविक रिसोर्टशी बांधिलकी का घेउ? ५. मला पाहिजे त्या वेळेस बुकिंग नाही मिळाले तर काय या प्रश्नाचे उत्तर नाही मिळाले. कुठे ना कुठे मिळेलच असे सांगितले गेले. पण रिसोर्ट नंबर * रुम्स यांचा मेंबरांच्या संख्येशी हिशोब जुळेना. त्यामुळे हा प्रश्न अनुत्तरित राहिला. शिवाय "कुठे ना कुठे" जाउन मी काय करणार? मला पाहिजे तिथे जाता आले पाहिजे ना? ६. खाण्यापिण्याचा खर्च माणशी १५०० रुपये जात होता त्याचवेळेस. दिवसाचा. म्हणजे एका कपलचे ३००० म्हणजे ७ दिवसांचे २१०००. मी ज्या हॉटेलांशी तुलना करत होतो (पक्षी रामसुख - महाबळेश्वर) तिथे हा खर्च अतिरिक्त पडत नव्हता. रुम टॅरिफ मध्ये इन्क्ल्युडेड होते. हा अतिरिक्त खर्च धरुन आता मला रुम टेरिफ प्रति दिवशी १०,५०० जायला लागले. परत तोच मुद्दा आला की अजुन काही वर्षांनी इतर हॉटेल्सचे रेट्स वाढतील आमचे नाही. म्हणजे तितकी वर्षे मी तोट्ञात काढणार असेच झाले. म्हणजे नक्की किती वर्षे हे कोणेच सांगु शकत नाही. ७. सगळी रिसोर्ट्स गावाबाहेर होती. थोडक्यात २४ तास वाहन हाताशी असेल तरच ठीक अन्यथा काही उपयोग नाही. नुसतेच पडे रहो. ८. बरीच महत्वाची शहरांमध्ये त्यांची हॉटेल्स होती. पण बर्‍याच शहरांमध्ये नव्हती सुद्धा. म्हणजे मी समजा काश्मीरला गेलो आणी श्रिनगर मध्ये हॉटेल्स असेल पण पहलगाम मध्ये नसेल तर इतके करुन मला तिथे दुसरे होटेल बुक करण आले किंवा समजा मी राजस्थानला गेलो तर फक्त उदयपुर आणि जयपुर ला हॉटेल्स असतील तर जैसलमेर, चित्तोडगड आणि जोधपुरला वेगळी हॉटेल्स बुक करायला लागतील. जिथे रजा मिळण्याची मारामार असते तिथे माणुस वर्षतुन फारतर एकदाच ७ दिवसाचा असा ब्रेक घेणार. त्यात ३ -४ दिवस वेगळ्याच होटेल्स मध्ये रहायला लागणार असेल तर पैसे वायाच ना? ९. त्यावर असा प्रतिस्साद आला की एका वर्षाचे ७ दिवस तुम्ही पुढची २ वर्षे वापरु शकता. हा पर्याय का कुणास ठाउक व्यवहार्य नाही वाटला. लगेच असे सांगितले गेले की तुम्ही तुमचे ७ दिवस तुमच्या कुटुंबातील कुणाला तरी देउ शकता. थोडे पैसे भरुन तिर्‍हाइतांना देखील. म्हणजे मी भुर्दंड सोसुन इतरांना ट्रिपा घडबायच्या? १०. मी त्याला विचारले की बाबा मी काही फक्त बायकोला घेउन जाणार नाही. आई वडील असतील बरोबर. तर तसे चालत होते पण त्यात ७ दिवसांमध्ये काही दिवस कमी होत होते. म्हणजे परत काही दिवसांसाठी इतर हॉटेल शोधणे आले. अखेर, एका ठराविक होटेलशी बांधिलकी, त्यांच्या रिसोर्‍ट प्रमाणे फिरण्याची शहरे प्लॅन करावी लागणे, किमान सुरुवातीला काही वर्षे तरी महाग असणारे / पडणारे दर, खाण्यापिण्यावरचा वेगळा (आणी अव्वाच्या सव्वा दरातला) खर्च, शहरापासौन लांब असणे, दर वर्षी सुट्टी घेउन फिरायला जाता येइलच याची शाश्वती नसणे, जवळपासच्या शहरातली हॉटेल्स इन्क्ल्युड नसणे, आधीपासुन बुकिंग करावे लागणे, बुकिंग मिळेल याची शाश्वती नसणे, एवढे करुन सर्वोच्च पॅकेज मिळत नसणे आणि या सर्वांवरची कडी म्हणजे २५ वर्षे कंपनी चालेलच आणी त्यामुळे ही स्कीम जिवंत राहिलच याची काहिही शाश्वती नसणे इत्यादी कारणांनी मी ती स्कीम नाकारली. आता ट्रिपअ‍ॅडव्हायजर वर बघतो तेव्हा कधी कधी (नेहमी नाही) त्या स्कीम मधली हॉटेल्स मेंबर नसलेल्यांना देखील मिळु शकतात. अगदीच हौस असेल तर वेगळे पैसे भरुन २-४ दिवस जाउ शकतोच की.