मैत्रीण ....... !!!!

मैत्रीण ....... !!!! माझ्याकडे दिवस डोक्यावर असताना तु चांदणे पाहत असतेस कदाचित , तुझ्या नि माझ्या देशातले ऋतूही सारखेच आहेत म्हणे .... ऋतूंबरोबर मैत्री बदलत नाही .... ती तिचा ओलावा कायम ठेवते, हे किती बरंय नाही ? कुठलातरी ढग कधीतरी गच्च भरलेला इथे माझ्या अंगणात येऊन बरसतो रापलेल्या इथल्या तृणांमधून तो, वाट काढत काढत दिशाहीन वाहत राहतो ....... 'तो 'ढग तुझा होता; ते मला कळत नाही, हे किती बरंय नाही ? कधी इथल्या उन्हाची झळ पोचत असेल तुला अन तुझ्या फुंकरीने थंड होऊन जात असेल, तू दारात शिंपडलेल्या सड्यामधले काही थेंब इथे मला चिंब करून टाकतात , त्या झळे मागे धावणारे एक मृगजळ होते , ते तुला कळत नाही, हे किती बरंय नाही ? हा ! कधीतरी होतेच कि ग भेट, तुझ्या डोळ्यातल्या अक्षरांबरोबर माझ्या न बोलणाऱ्या शब्दांची, अन आपल्या नजरेमध्येच दाटलेल्या त्या रिकाम्या ओळीत ती अक्षरे नि शब्द, कंठ फुटल्यासारखे उमटतात रिकामी ओळ गच्च भरून टाकतात .... डोळे बंद करेपर्यंत तेव्हा , ते इतर कुणाला कळत नाही , हे किती बरंय नाही ? ------------ फिझा