दृष्टीकोन

नेत्रभिंग बसवले नवीन, पण कोन तोच दृष्टीचा, वैद्यकीय प्रगती अफाट, उपयोग काय हो त्याचा ! लांबले आयुष्यमान, भर शून्य कर्तुत्वाचा, तगले जीव अनेक, उपयोग काय हो त्याचा ! जल, रस्ते, हवाई मार्गे, आक्रसला भूगोल जगाचा, वेळ नाही घरी थांबायाला, उपयोग काय हो त्याचा ! वसविली आडवी नगरे, गाठला कळस उंचीचा, निसर्ग नाहीसा केला, उपयोग काय हो त्याचा ! लडबडला, मग गडबडला, भाव अहो तेलाचा, अर्थशास्त्रात खुलासे अनेक, उपयोग काय हो त्याचा ! महागाई आली गेली, झगडा चालूच आयुष्याचा, सुगी जगाच्या बाजारी, उपयोग काय हो त्याचा ! उपसुनी खनिजं बेसुमार, गल्ला भरती बाजाराचा, मिटे ना दारिद्र्यरेषा, उपयोग काय हो त्याचा ! खुळखुळे पैसा हातात, संपे न हव्यास सुखाचा, खुळखुळा होई जीवाचा, उपयोग काय हो त्याचा ! आधी शोध शून्याचा, आता वेध अनंताचा जगाच्या लोकसंख्येला, उपयोग काय हो त्याचा ! उमज ना सारासार, तरी हक्क असे मतदानाचा, लोकशाही भले हीss मोठ्ठी, उपयोग काय हो त्याचा ! मानवी व्यवस्थांचा ऊत, त्यात विवेक नाही साचा, गीतेचे सार अनेक, उपयोग काय हो त्याचा ! [टीप: विंदा करंदीकर यांच्या ‘उपयोग काय त्याचा’ ह्या कवितेवरून सुचलेली कविता]