मेथी कॉर्न पुलाव

साहित्य
१/२ कप मक्याचे दाणे (स्वीट कॉर्न)
३/४ कप चिरलेली मेथी
२ मध्यम आकाराचे कांदे, उभे चिरून
२ ते ३ हिरव्या मिरच्या, बारीक चिरून
२०० ग्रॅम बासमती तांदूळ, धुवून, अर्धा तास भिजत घालून
१ मोठा चमचा तूप (किंवा तेल)
५ ते ८ काळेमिरे
१ तुकडा दालचिनी
३ ते ४ लवंग
३ ते ४ वेलदोडे
१/२ चमचा हळद (ऐच्छिक)
मीठ चवीनुसार
२ कप गरम पाणी

कृती
यंदा पावसाच्या कृपेने बाल्कनीत लावलेली मेथी भरपूर आली, त्यामुळे हि एक झटपट पण छान पाककृती करता आली.

पातेल्यात तूप गरम करून, त्यात खडे मसाले (काळेमिरे ते वेलदोडे) एक ते दोन मिनिटे परतून घ्या. उभा चिरलेला कांदा घालून, कांदा २ ते ३ मिनिटे परतून घ्या.

ह्यात चिरलेली मेथी, बारीक चिरलेल्या हिरव्या मिरच्या आणि मक्याचे दाणे घालून मध्यम आचेवर चांगले ३ ते ४ मिनिटे परतून घ्या.
 

ह्यात भिजवलेला तांदूळ (पाणी निथळून), मीठ आणि हळद (वापरत असल्यास) घालून मिश्रण अजून थोडं परतून घ्या, ह्यात आता २ कप गरम पाणी घालून, एक उकळी येऊ द्या. गॅस कमी करून, पातेल्यावर झाकण ठेवून पुलाव शिजवून घ्या. हाच पुलाव कुकर मध्ये करत असाल तर २ शिट्ट्या काढून घ्या.

गरम गरम पुलाव दह्या सोबत खायला घ्या!