चष्मा !

आता हे सुध्दा तुम्ही चष्म्यासकट वाचत असाल तर माझ्या बर्‍याच प्रश्नांची उत्तरे तुमच्याकडे आहेत. गेले कित्येक दिवस या चष्म्याने मला नकोसे करुन टाकलेय. रात्री एकतर झोपच लागत नाही नाहीतर स्वप्नात चष्मा येउन मला जाग येते. काम करताना उगीचच नजर अधु झाल्यासारखी वाटते. समोर कुणी चष्मा लाउन बसलेलं असेल तर माझं लक्ष कामातुन निघुन तिकडे जातं आणि मग झालेल्या चुका शोधताना डोळ्यांच्या मदतीला चष्मा नसतो.
मुळात या चष्मा प्रकरणाचा शोध कुणी लावला? जगातल्या नक्की कोणत्या व्यक्तीला `जगातला पहीला चष्मिष्ट' अशी प्रसिध्दी मिळाली? एखाद्या घरात अगदी लहान मुलांपासुन ते आजोबांपर्यंत सगळ्यांना चष्मे कसे काय असतात? बरं असतात तर असतात मग त्यातल्या लहान मुलाला नक्की किती वयाचा असताना चष्मा लागतो? तो लागला आहे असे कसे कळते? बरं आगदी पाळण्यात खेळायच्या दिवसात चष्मा लागतो का? लागला तर तो मुलांना लावायचा कसा? आणि आपण लावलाच तो बळजबरीने, तर तो त्यांनी का म्हणुन टीकवायचा? हे माझे काही मुलभुत प्रश्न. पण याच्या पुढेही काही प्रश्न नविन तयार होऊन मला आणखी त्रास देत रहातात.
चष्मेवाली माणसं झोपताना चष्मा न लावता झोपतात मग त्यांना स्वप्नं व्यवस्थित दिसतात का?
चष्मा दुरचा वेगळा आणि जवळचा वेगळा असे बाळगणारे लोक दुरची वस्तु जवळ जाउन का पहात नाहीत? म्हणजे त्यांच्या एका चष्म्याचा खर्च वाचु शकेल. बरं नेमका जवळचे दाखवणारा चष्मा हरवला तर त्याला शोधायला ही माणसे दुर जाउन उभी रहात असतील का?
"झिरो नंबरचा चष्मा वापरतो" असे म्हणणार्‍या लोकांची नजर कमजोर नाही का? कारण चष्मा नसलेल्या माणसाची दृष्टीक्षमता सहा भागीले सहा म्हणजे ६/६ असते असे म्हणतात.
उन्हाचा त्रास होऊ नये म्हणुन चष्मा लावणारे लोक एकाच रंगाच्या काचांचे चष्मे का नाही वापरत?
गाडीवर घालायचा चष्मा वेगळा आणि काम करताना घालायचा चष्मा वेगळा असे करणारे लोक म्हणजे `खायचे दात वेगळे आणि दाखवायचे वेगळे' याचे मुर्तीमंत उदाहरण नव्हेत काय?
चष्मा लावणारी लोकं जेंव्हा चष्म्याच्या आडून देखील बारीक डोळे करुन पहातात तेंव्हा त्याना आणखी एखाद्या चष्म्याची गरज असते का?
चष्मेवाला माणुस भडकला तर बिनचष्मेवाल्यापेक्षा जास्त हिंस्त्र का दिसतो?
बरं जरी झालीच त्याची कुणाशी लठ्ठालठ्ठी, तर त्यात समोरच्या माणसाने त्याचा चष्मा फ़ोडून टाकला, तर पुढे काय?
`वरचश्मा असणे' हा वाक्प्रचार एखाद्या चष्मेवाल्याने सुरु केला असावा काय?
`चश्मेबद्दुर' हे गाणे चष्मा लावुन पहावे किंवा ऐकावे काय?
बरं हे गाणे मुळात ` तेरी प्यारी प्यारी आँखोको' असे भलत्याच विरुध्द टोकाकडून कसे काय चालु करायचे सुचले असावे?
कोर्टातले `चष्मदिद गवाह' हे ती घटना चष्मा लाउन पहाणारे असतात का ?
चष्मा आणि चाळशी यात नेमका फ़रक काय?
दोन चष्मेवाले एकमेकांकडे पहातात त्याला `नजरभेट' म्हणावं की चष्मा भेट?
एखाद्या चष्मेवाल्याने चष्मा काढुन ठेवल्यावर आपण त्याला आणि त्याने आपल्याला कसे ओळखावे?
डबल भिंगाचा चष्मा म्हणजे नक्की काय? कारण त्यांना काचा तर प्रत्येक डोळ्यासमोर एक अश्या दोनच असतात.
बरं चष्मा लावल्यावर माणुस भारदस्त दिसतो असा बरेच जणांचा समज का असावा?
आणि सर्वात महत्वाचे म्हणजे आपल्याला चष्मा लागला म्हणजे दृष्टी कमजोर झाली यापेक्षा नविन चष्मा घेता येणार असा आनंद लोकांना का होतो?

सध्या मला सारखे हे प्रश्न भेडसावतायत कारण आठच दिवसापुर्वी सौ. ला चष्मा लागलाय आणि घरात असे म्हणतात की त्यामुळे ती माझ्यापेक्षा जास्त गंभीर आणि विचारवंत दिसते.