मनात माझ्या

तुझ्या बटांतून अवखळ वारा
छेदित जातो सळसळ पाने
मनात माझ्या तुझ्या ओठीचे
अल्लड आणिक अचपळ गाणे

नदी वळावी कटी पाहूनी
ओठांवरती लाली नभाची
मनात माझ्या कवेत घ्यावी
मोहक मूर्ती तुझ्या तनाची

फिकेच पडती सागर येथे
इतुके चंचल नयनी पाणी
मनात माझ्या खोल आतवर
तुझ्या प्रीतीची अबोल वाणी

सुरेख बांधा घट्ट कंचुकी
पदर जरीचा त्यावर तारे
मनात माझ्या चुंबून घ्यावे
पाठीवरचे कोंदण प्यारे

लाखेचे ते चढवूनी कांकण
साद कशाला नुपूर पदांना
मनात माझ्या इथे टिपावे
तुझ्या खोडकर खेच अदांना

घरा घरातून दर्प सुटावा
देह तुझा की आहे अत्तर
मनात माझ्या प्रश्न कितीसे
तूच त्यावरी होशी उत्तर

गाभाऱ्यातील देव मनाचे
तुझ्या कांतीने उजळून जावे
मनात माझ्या जगता जगता
काव्य तुझ्यावर लिहून जावे

- किरण कुमार