झणझणीत सुकं मटण

Image removed. आता बरेच लोक म्हटले की या दिपाली ला फक्त गोड च पदार्थ येतात की काय? मला येतात सगळे प्रकार बनवता पण मी ऐकलं आहे की माझ्या पाकृ (उदा: खानदेशी शेव भाजी) कोणीतरी कुठल्यातरी पेपरात छापली होती तेही अगदी त्याच फोटो सोबत आणि तेही मला न विचारता.. आत्ता काय बोलावं , पकडला जात नाही तो काही चोर थोडीच असतो .जाऊ देत... झणझणीत सुकं मटण. साहीत्यः २ पाउंड मटण , आमच्या इकडे अफगाणी हलाल दुकान आहे तिकडे छान मिळतं पण तो खडुस दुकानवाला (तसा म्हातारा ही आहे म्हणून आम्ही सोडुन देतो) काही २-३ पाऊंड च्या खाली देत नाही आणिक वरुन काहीतरी बरळत बसतो अफगाणी भाषेत. गेला उडत...त्याच्या बरळण्याने कावळा देखिल हलणार नाही मग आम्ही कसले हलतोय!! असो. २ मध्यम कांदे १/२ वाटी सुके खोबरे लागेल तसे तेल -मी १/४ कप तेल घेते पण मटणा ला पण तेल सुटतं त्यानुसार वाटलेला मसाला परतवण्या योग्य तेल घ्यावे. चवीनुसार मीठ २-३ अमेरिकन लसुण पाकळ्या १ इंच आले २ टे. स्पु. मिरे १ टी. स्पु. लवंगा १ टे. स्पु. गरम मसाला २ तमालपत्र ७-८ पाने पुदिना बचकभर कोथिंबीर लाल तिखट - तिखट जसे हवे तस्से घ्या मी २-३ टे.स्पु. घेते कमी झाल्यास अजुन टाकते. मटण नीट स्वच्छ करुन धुऊन घ्यावे. Image removed. कृती: १) प्रेशर कुकरात कांदा उभा चिरुन थोड्या तेलावर भाजुन घ्या. २) खोबरे , मसाला पण भाजुन घ्या. ३) भाजलेला कांदा + खोबरे + मसाला + पुदिना + कोथिंबीर + लसुण + आलं यांना बारिक वाटून घ्यावे. ४) तापलेल्या तेलात वरिल मसाला + तिखट + गरम मसाला टाकावा. ५) मसाला तेल सुटेपर्यंत नीट भाजुन घ्यावा. ६) आता धुतलेले मटण टाकावे व नीट परतुन घ्यावे. ७) १- १/१/२ वाटी पाणी व मीठ टाकुन ३-४ शिट्ट्या माराव्या. ८) कोथिंबीर टाकुन वाढा. Image removed. टीपा: १) पाणी जास्त टाकु नये. जास्त पाणी झाल्यास शीटी काढल्यावर मध्यम गॅसवर ठेवुन आटवावे.

अरे कोणी आहे कारे तिकडे.
ह्या पाटलीण बाईंना मिपावरून काढून अंधारकोठडीत टाका पाहू ८ दिवस. विना बकलावा-सुक्या मटणाचे राहुदे त्यांना :)
लोकांचे एका दिवसात किती हाल करायचे ते फोटू टाकून त्याला काही सुमार? छ्या!

(अफगाणी) विंजिनेर

----
कळप-मनोवृत्तीचा सूक्ष्म अभ्यास करण्यात आम्ही गढलेलो असल्यामुळे कंपूबाजी करायला आमच्याकडे वेळ नाही

अरे बाबा, दिपालीताईंच्या आख्ख्या पाककृत्या हायजॅक होताहेत आणि एका जहबहर्‍याचा कसला कॉपीराईट रे? :)

दिपालीताई,
आमचा आपल्या चरणी साष्टांग नमस्कार हो! तुमच्या पहिल्या वाढदिवसाला काय अन्नपुर्णेच्या हातात असते तशी कोणी हातात पळी वगैरे दिली होती का हो? :)

बरं, एक सांगा, पा.कृ.शिकवण्याची फी किती घेता? आमच्या सौ.ला तुमच्याकडे शिकवणीसाठी पाठवावं म्हणतो :)

----------------------------------------------------------------------------------------
::::हल्ली चालु असलेल्या मराठी-आंतरजालीय-टोळीयुध्दाचा आपण एक भाग नाही आहात? काय सांगता? स्वतःला कर्कवृत्ती मराठी माणुस कसे काय म्हणवता?::::

झक्कास पाकृ. रविवारी टाकायची सोडून सोमवारी का टाकली? आता आठवडाभर वाट पाहणे आले!

Doing what you like is freedom. Liking what you do is happiness.

ती भरलेली वाटी बघून जुन्या आठवणी चाळवल्या! धन्यवाद!! :)

(निरामिष)चतुरंग

सूचना - दिपालीताई, फोटू टाकताना त्यावर तुमच्या नावाचा वॉटरमार्क टाकावात म्हणजे पाकृ हायजॅक झालीच तरी निदान फोटू तरी हायजॅक होणार नाही.

दिपाली, नको ग असा छळ करू. शुक्रवारी संध्याकाळी बेत करावा तर आषाढी. आता रविवार पर्यंत वाट पाहाणे आले.
आणि त्या रेसिप्यांच्या फोटोवर नाव डकव तुझं म्हणजे चोर पकडला जाईल.

खरोखर ज-ह-ब-ह-रा-हा (प्रताधिकार - धमु)
बरं झालं भरल्यापोटी बघितला फोटो नाहितर भुकेने पोटात अ‍ॅटॅक आला असता ना!

ऋषिकेश
------------------
बुद्धीसाठी लोह वाढवणारी औषध घ्यायला लागल्यापासून "डोकं गंजलं तर!" ही भिती वाढली आहे

येथे परदेशात बसून ही छायाचित्रे पाहाणे म्हणजे /पाक्रु वाचणे म्हणजे ब्रम्हाचार्या समोर बेबो चा नाच.

याययाययययाअयाअयाय्ययाअ !! फिस्स्स्स्स !!१
भारतात कधी येताय ? सिरीयसली म्हणतोय !!
खाण्यासाठी किडण्यापींग बहुदा पहिल्यांदाच होणार आता !!

(किडण्यापर) टार्‍या हटेला

एकाच दिवशी ?
अग बाई पदार्थ करण्याची तुझी नक्की रेंज किती आहे? =D>
मटणाबरोबर गरम गरम भाकरी आणि कांद्याचा फोटो टाकला नाहीस ह्याचा निषेध करावा की 'निदान तेवढा त्रास कमी' असं म्हणावं ? :?

---------------------------
माझा ब्लॉगः
http://atakmatak.blogspot.com

शाकाहारी आहे मी पण तुम्ही मला अभक्श खायला लावणारच असे दिसते

काय हे? काय हे? तेही संकष्टीच्या दिवशी?

फोटू बाकी जीवघेणा बर्रका!

झणझणीत दिसतय.
पण खाल्ल्याशिवाय कळणार तरी कस?
मग लक्षात आल की प्रतिसाद दिला की कदाचित आमंत्रन मिळेल.
मग सविस्तर प्रतिसाद देता येईल.

की-बोर्डवर लाळ गळू नये म्हणून इतकावेळ प्रतिसाद द्यायचा थांबलो होतो. ;-)
खल्लास पाकृ आहे ही आणि सोपीही वाटतेय. लवकरच करून आस्वाद घेतला जाईल असा मनोमन ठराव केव्हाच पास झालेला आहे!
धन्यवाद दिपालीतै!

गरमा गरम भाकरीचा तुकडा त्या वाटीत बुडबुन भुरका मारण्याचा मोह आवरता येत नाही. :)

नेमकं काल संकष्टीलाच हा धागा वर काढल्या बद्दल आचारी बुवांना वाढदिवसाच्या शुभेच्छा!!!
कै च्या कै जळफळाट झाला राव.