मुरबाडी आमटी

साहित्य :
१/२ वाटी मूगाची डाळ , १ वाटी तुरीची डाळ , लसूण (६ ते ७ पाकळ्या), ताजं खोबरं (एक वाटी),बडीशोप (एक चिमूट), मीठ , लाल तिखट , हळद , हिरवी मिरची ,कढीपत्ता
३ कांदे , १ बटाटा , २ टमाटो , तेल ,जिरं ,मोहरी.

कृति :
१कांदा ,बटाटा व टमाटो च्या फोडी करून घेणे.
दोन्ही डाळी नीट धुवून गरम पाण्यात शिजण्यास ठेवणे.डाळ शिजत आली की त्यात थोडा कढीपत्ता (कच्चा) घालणे.
२ कांदे लांब चिरून घेणे ; लसूण फक्त ठेचून घेणे ; पाऊण वाटी खोबरं व बडीशोप मिक्सरमधे वाटून घेणे ;
तेलावर जिरं ,मोहरी ची फोडणी करून त्यात हिरवी मिरची (तुकडा),कढीपत्ता घालून त्यात चिरलेला कांदा घालणे.
कांदा चांगला लाल होत आला की त्यात ठेचलेली लसूण घालणे नीट परतून झाल्यावर त्यात वाटण घालावे. वाटण कांद्याशी एकजीव झाले
की त्यात लाल तिखट ( नेहमीपेक्षा दुप्पट), हळद( अगदी चिमूटभर ) घालून थोडा वेळ परतावे नंतर कांदा ,बटाटा व टमाटो च्या फोडी घालून थोडा वेळ वाफेवर ठेवावे.
{ एका बाजूला डाळी शिजत असू द्या.}
फोडणी झाल्यावर शिजलेली डाळ त्यात घालून १५ मिनीटे उकळविणे.चवीप्रमाणे मीठ घालून त्यात शिल्लक खोबरं व कोथिंबीर घालणे.
ही आमटी बासमती पेक्षा जाड्या तांदूळाच्या भाताबरोबर जास्त छान लागते.
चवीप्रमाणे लाल तिखट आणि लसूण यांचे प्रमाण कमी जास्त करावे पण कमी असल्यास मुरबाडी झटका अनुभवता येणार नाही.