कॉफीचा कप

कपातून कॉफी प्यायला देऊन नंतर रिकाम्या कपात राहिलेल्या डागांवरून आणि थेंबांवरून भविष्य सांगण्याची पुरातन पद्धत आहे. बहुधा ग्रीस आणि आजूबाजूंच्या देशांत. ;) आता इथले ज्योतिषी सुरू झाले नाहीत म्हणजे मिळवली. ;)

मी फक्त एवढंच सांगू शकते की कॉफी उत्तम झाली असावी आणि आनंदाने गट्ट केलेली असावी.

पिऊन झाल्यावर कपाला चिकटून उरलेल्या (सायमिश्रित) कॉफीची आणि टेबलाच्या/लाकडी फ्लोअरिंगच्या (नेमकं काय?) उडालेल्या पॉलिशची रंगसंगती छान जमलीय.

विडंबनाची कल्पना आवडली. पुढल्या वेळेस जमल्यास चरणार्‍या डुकरांचा क्लोज़अप व्हिडियो (आवाजांसकट) अपलोड करता आला तर पहावा म्हणतो... (कॅमेरा कुठला ते घरी जाऊन पहावं लागेल. बहुधा कॅनन ए७५० की ए५७० की असंच काहीतरी...)

मुद्दे चांगले आहेत. रंगसंगती महत्त्वाची याबद्दल टग्या यांच्याशी सहमत.
आणखी काही चित्रे:
यातील रंगसंगतीही खासच :

हे पुढील चित्र तर विक्रीसाठी ठेवले आहे!

यातून पैसेही मिळू शकतात तर!

**(सीरियसली - वरील पहिले चित्र फारच चांगले काढलेले आहे, विडंबनातही फोटोग्राफरची सफाई दिसते.)**

फोटोग्राफी इज नॉट एव्हरीवन्स कप ऑफ कॉफी, असे यातून सुचवायचे नाही ना? :)

नंदनमराठी साहित्यविषयक अनुदिनी

फोटोंच्या विडंबनासाठी काही कल्पना

१. झिजलेली चप्पल
२. शिंकताना वाकडा झालेला चेहरा
३. जांभई देताना उघडलेला जबडा
४. घरातला कचर्‍याचा डब्बा
५. महिने न महिने न धुतलेला कमोड (अनेक बॅचलरांकडे असण्याची शक्यता आहे ;))

रहस्यकथेसाठी मुखपृष्ठावरील छायाचित्र म्हणून उत्कृष्ट आहे. (पार्श्वभूमी ही रंग उडालेले टेबल नसून रंग उडालेले लाकडी फ्लोअरिंग आहे याची भरपूर वेळ नीट निरीक्षण केले असता खात्री पटावी.) प्लॉटमध्ये कोणीतरी कोणालातरी कॉफीत विष घालून मारणे हे ओघानेच आले. ज्याअर्थी पिणाराची कॉफी संपूर्ण पिऊन झाली आहे त्याअर्थी विष रक्तात हळूहळू भिनणारे आहे. म्हणजे सायनाइड नसावे. (नेमके काय असावे ते कधी कोणाला कॉफीतून विष घालून मारले नसल्यामुळे मला सांगता येणार नाही. तज्ज्ञांनी माहितीत भर घालावी.) मुडदा कपाशेजारी पडलेला नाही. याचा अर्थ कॉफी पिऊन झाल्यावर बर्‍याच अवधीनंतर व्हिक्टिमास ('व्हिक्टिम'साठी इथे फिट्ट बसेल असा मराठी प्रतिशब्द काय?) मृत्यू आला असावा. ही आत्महत्या असावी की खून? आत्महत्या नसावी. कारण आत्महत्या असती तर कप असा जमिनीवर पडून राहिला नसता. मृताने तो कॉफी पिऊन झाल्यावर स्वयंपाकघरातील सिंकात किंवा डिशवॉशरमध्ये जाऊन नीट ठेवला असता. निश्चितपणे खूनच झाला आहे. व्हिक्टिम हा आरामात दिवाणखान्यात किंवा स्वयंपाकघरातील ब्रेकफास्ट एरियात (पण लाकडी फ्लोअरिंग आहे त्याअर्थी दिवाणखान्यापेक्षा स्वयंपाकघरातील ब्रेकफास्ट एरिया असण्याची शक्यता अधिक. दिवाणखाना असता तर कार्पेट असण्याची शक्यता ५०-५०.) जमिनीवर आडवा होऊन कॉफी पीत असावा. कॉफी नुकतीच संपली असावी, आणि अचानक मळमळल्यामुळे वांती काढण्यासाठी कप जमिनीवर तसाच टाकून तो तातडीने बाथरूममध्ये पळाला असावा, आणि तेथेच त्याचा मृत्यू झाला असावा. (बाथरूमचा नीट शोध घेतल्यास मृतदेह तेथेच सापडावा.)

ज्याअर्थी ही आत्महत्या नाही, त्याअर्थी ती कॉफी त्याला कोणीतरी बनवून दिलेली असावी. याचा अर्थ तो एकटा राहत नसावा. मात्र तो विवाहितही नसावा, कारण त्याची बायको त्याला असे जमिनीवर पहुडून कॉफी पिऊन देणे केवळ अशक्य! म्हणजे बहुधा रूममेटबरोबर राहत असावा, आणि रूममेटनेच त्याला कॉफी बनवून दिली असावी. मात्र मृत्यूनंतर लगेचच कोणीतरी येत आहे असे वाटल्यामुळे रूममेटला पळ काढावा लागला असावा. कारण कॉफीचा कप जागचा हलवून त्याची विल्हेवाट लावण्याइतकाही वेळ त्याला मिळालेला दिसत नाही. म्हणजे मृतदेहाची विल्हेवाट तर निश्चितच लावता आलेली नाही. मृतदेह खात्रीने बाथरूममध्येच सापडावा!

खुनाचे कारण (मोटिव्ह) पैसा हे निश्चित नसावे. कारण ज्याअर्थी १. मृत हा बॅचलर होता आणि २. त्याला रूममेट घेऊन राहण्याची गरज भासत होती त्याअर्थी आणि ३. एकंदरीतच फ्लोअरिंगची अवस्था पाहता तो सधन नसावा. बहुधा प्रेमाचा त्रिकोण असावा असा कयास करायला हरकत नसावी. (अशा प्रकारच्या रहस्यकथांत बहुधा पैसा नसला तर प्रेमाचा त्रिकोण हेच कारण बहुतांशी असावे असा अंदाज आहे. खूप रहस्यकथा वाचलेल्या नसल्यामुळे खात्रीने सांगता येत नाही, त्यामुळे यावर एक्सपर्ट कॉमेंट्स इतर सूत्रांकडून येतीलच. पण एखाद्या हेरगिरीच्या प्रकरणातून वगैरे रुममेटने काटा काढण्याइतका मृत किंवा त्याचा रूममेट चित्रावरून तरी ग्लॅमरस वाटत नाही. असता तर कॉफीच्या कपाऐवजी व्हिस्कीचा पेला आणि एखाद्या बर्‍यापैकी ऍशट्रेवर एखादा अर्धाजळका चिरूट नसता पडला? तेव्हा प्रेमाचा त्रिकोण असण्याचीच शक्यता अधिक. या अँगलवर अधिक संशोधन केल्यास बहुधा लीड्स मिळावेत.) एलेमेंटरी!

प्रेमाच्या त्रिकोणाच्या तिसर्‍या कोनामध्ये पट्टीच्या डिटेक्टिवांस काडीचेही स्वारस्य नसावे.

रहस्यकथेचे शीर्षक काय असावे? 'कॉफीच्या पेल्यातील वादळ'? 'रिकाम्या पेल्याचे रहस्य'? 'विषाची परीक्षा'? की आणखी काहीतरी? सूचना आणि निविदा मागवण्यात येत आहेत.

छ्या! असले चहा कॉफीचे रिकामे कप पाहायला आपल्याला नाय आवडत! :(

तात्या.

फोटोच्या विडंबनाची कल्पना मस्त...
पण प्रतिसादाचे विडंबन करायला फोटोग्राफीची माहिती नाही...
नाहीतर रंगसंगती, ऍपर्चर, स्पीड, लेन्स असल्या शब्दांचा मार्मिक गुंता ठोकून दिला असता...
______________________________
ही आमची अनुदिनी ... http://bhadkamkar.blogspot.com/

जिप्सी जमातीत कॉफी पिउन झाल्यावर तळाशी राहिलेल्या गाळातुन पण भविष्य सांगणारे महाभाग आहेत.
प्रकाश घाटपांडे

हा कॉफिचा पेला जीवनाचे महत्व आणि त्या अनुषंगाने जीवनात येणारे कडू गोड अनुभव अधोरेखित करतो.

पेल्यातील संपलेला चहा हे जीवनातल्या संपत आलेल्या पळांचे/घटकांचे प्रतिक आहे.
पेल्यात तळाशी राहिलेला चहा हेच दर्शवतो कि अजून काहि क्षण शिल्लक आहेत. (जान अभी बाकि है मेरे दोस्त!!!)

चहा मधील गोडवा हा जीवनातल्या सुखद आणि आनंदि क्षणांचे द्योतक आहे तर चहा पावडरितला कडवट पणा अप्रिय घटना अधोरेखित करतो.

पेल्या बरोबर बशी नाहि म्हणजे जीवनातल्या अंतिम क्षणी जीवनसाथीचा अभाव.

(छे! कंटाळा आला)

मंडळी,
आपण या कॉफिच्या कपाकडे पाहिलेत आणि तो आपल्याला आवडला याचा आनंद वाटला :).
खरेतर व्यंगचित्रामध्ये जसे थोडिशी अतिशयोक्त्ती करुन विनोद निर्माण करतात तसाच विनोद 'चित्रे टाकणे' या प्रकावर करायचा हा प्रयत्न होता. आपण सर्व तो खेळीमेळीने घ्याल अशी खात्री होती आणि ती सार्थ ठरली. खेळीमेळीच्या प्रतिसादासाठी सर्वांचे आभार.
-- लिखाळ.

फोटो तितका काही इंट्रेस्टींग नाहि :)

बाकी फोटो बद्दलची माहिती, फोटो संगणकावर नेल्यानंतर, प्रॉपर्टीस मध्ये कळेल.

--
ध्रुव