इडियाप्पम (स्ट्रींग हॉपर्स) आणी गाजर रस्सम
Primary tabs
साहित्य गाजर रस्समः
१/२ वाटी तूरीची डाळ स्वच्छ धुवून २०-२५ मिनिटे भिजवलेली
१ टोमॅटो बारीक चिरून घेतलेला
१ मोठं गाजर किंवा २ छोटी गाजरं किसून
दीड टेस्पून रस्सम मसाला ( तुम्ही रेडीमेड आणू शकता किंवा मी घरी बनवलेल्या रस्सम मसाल्याची पाकृ खाली दिली आहे)
१-१/२ टीस्पून चिंचेचा कोळ
१/२ टीस्पून हळद
१/४ टीस्पून साखर (ऐच्छिक)
१/४ टीस्पून हींग
१ टीस्पून मोहरी
५-६ कढीपत्ता
मीठ चवीनुसार
बारीक चिरलेली कोथींबीर
रस्सम मसाला: १ -१/२ टेस्पून अख्खे धणे, २ टेस्पून तूरीची डाळ, २ टेस्पून चण्याची डाळ, १ टीस्पून अख्खी काळी मिरी, १ टीस्पून जीरे, ४-५ लाल सुक्या मिरच्या, १/२ टीस्पून मेथीदाणे. सर्व साहित्य एक एक करुन तव्यावर कोरडेच भाजून घ्यायचे. पुर्ण गार झाले की मिक्सरमध्ये एकत्र वाटून बारीक पूड करुन घ्यावी. साधारण अर्धी वाटी रस्सम मसाला तयार होतो.
पाकृ:
भिजवलेली तूरीची डाळ, टोमॅटो, हळद व थोडे हींग एकत्र करुन घ्यावे. त्यात नेहमीपेक्षा जास्त पाणी घालून कुकरला डाळ शिजवून घ्यावी.
शिजवलेली डाळ-टोमॅटो चांगले घोटून घ्यावे व गाळणीतून गाळून डाळीचे पाणी काढून घ्यावे.
डाळीचे पाणी एका पातेल्या उकळायला ठेवावे.
त्यात किसलेले गाजर, साखर व रस्सम मसाला घालून उकळावे.
आता त्यात चिंचेचा कोळ व चवीप्रमाणे मीठ घालून, झाकून उकळू द्यावे.
वरुन कोथींबीर घालावी व गॅस बंद करावा.
बुट्टीत तेल गरम करुन मोहरी, हींग व कढीपत्त्याची फोडणी करावी.
ही फोडणी तयार रस्समवर ओतावी व झाकून १० मिनिटे तसेच ठेवावे.
साहित्य इडियाप्पमः
२ वाट्या तांदळाची पीठी
२ वाट्या पाणी
१ टेस्पून तेल
चिमूटभर मीठ
पाकृ:
पातेल्यात पाणी, मीठ व तेल एकत्र करुन उकळी आणावी.
उकळी आली की त्यात तांदळाची पीठी घालून चांगले ढवळावे.
गॅस बंद करुन , झाकून तसेच १५ मिनिटे ठेवावे.
उकड हलकी गरम असतानाच ताटात किंवा परातीत काढावी व तेल-पाण्याच्या हाताने चांगली मळून घ्यावी.
चांगली मळून त्याचे उंडे तयार करुन घ्यावे.
इडलीपात्राला व सोर्याला (चकलीचा साचा) तेलाचा हात फिरवून घ्यावा.
सोर्यात बारीक भोकांची जाळी लावून घ्यावी.
तयार उंडा त्यात घालून, इडलीपात्राच्या प्रत्येक गोलात, गोलाकार शेवया पाडून घ्याव्या.
इडली स्टँड इडलीच्या कुकरमध्ये किंवा प्रेशर कुकरमध्ये ठेवून १५-२० मिनिटे वाफवून घ्या. (प्रेशर कुकर वापरणार असाल तर शिट्टी लावायची नाही)
वाफवलेले इडियाप्पम ५ मिनिटे गार होऊ द्या,
हलक्या हाताने सर्व्हींग प्लेट्मध्ये काढून घ्या व गाजर रस्समबरोबर सर्व्ह करा.
नोटः
इडीयाप्पम तुम्ही सांबार, नारळाची चटणी, एग करी किंवा व्हेज स्ट्यु बरोबर ही सर्व्ह करु शकता.
आवडत असल्यास इडलीपात्राच्या प्रत्येक गोलात थोडा ओला नारळ घाला व त्यावर शेवया पाडून घ्या.
अशा पद्धतीने तुम्ही नाचणीच्या पिठाचे ही इडीयाप्पम बनवू शकता.
हे नारळाच्या दुधात अगदीच झकास लागतात.
जरा आधी का नाही टाकलीस पाकृ? मी आताच उकडीच्या भाकर्या करून खाल्ल्यात!
मायला, सानिकातैंच्या घरच्यांची काय चंगळ असेल नै???? रोजच चैन. शिकरण अन मटार उसळ पण इतक्या पद्धतीने बनवत असतील काय माहिती =)) फटू बगूनच खपल्या गेलो आहे हेवेसांनल.
काय फोटू आलेत राव.
त्या भाग्यवान माणसाला (म्हणजे कोण हे सांगायची गरज नसवी) भेटव.
त्याचा मला हेवा वाटतो.
एकदम बाडीस.
देव्हार्यात जशी अन्नपूर्णा देवी असते तशी मिपावर सानिका आहे.
फोटू आणि पाकृ फारच आवडले.
काय छान उपमा दिली आहेस.
सुरेख पाकृ.
नेहमीप्रमाणे.
तुमच्या पाक-क्रुती वाचणे आणि बघणे बंद केले आहे...
वर म्हट्ल्याप्रमाणे कोकणात नारळाचं दुध घालून खातात. हा प्रकार पण करून पाहीन.
आम्ही हे असं करतो. याला शिरवळे म्हणतात.
जेवण झाल्यावर किती अत्याचार होत आहेत.
शिरवाळी करताना उकडीचे मुटके उकळत्या पाण्यात सोडतात आणि उकळत असताना एकदा पाण्यावर तरंगायला लागले की शिजले असं समजायचं. मग सोर्यात घालून त्याच्या शेवया पाडायच्या. हे त्यामानाने सोप्पंय. नुसत्या उकडीवरच आटपलंय.
वर तुम्ही सांगितल्याप्रमाणे केले तर पुन्हा शेवया वाफवायची गरज नसते.
माझी आई तांदळाच्या पीठाचे नुसते उंडे तयार करते मग तुम्ही सांगितले तसे पाण्यात शिजवून घेते , असे केल्याने सोर्यातून शेवया पाडल्यावर पुन्हा वाफायची गरज नसते.
कोकणात आमच्याकडे वर दिल्या पाकृप्रमाणे शेवया इडल्यांप्रमाणे गोलाकार पाडून न घेता हळदीच्या पानावर पाडून घेतल्या जातात व त्या पानासकट वाफवल्या जातात. ह्या शेवया नारळाच्या रसाबरोबर किंवा आमरसाबरोबर खायला देतात :)
माझी आई तांदळाच्या पीठाची नुसती उकड काढून उंडे तयार करते मग तुम्ही सांगितले तसे पाण्यात शिजवून घेते , असे केल्याने सोर्यातून शेवया पाडल्यावर पुन्हा वाफायची गरज नसते.
नाचणीच्या पण होतात अशा पण तांदळाची सर नाही त्याला.
"कोकणात आमच्याकडे वर दिल्या पाकृप्रमाणे शेवया इडल्यांप्रमाणे गोलाकार पाडून न घेता हळदीच्या पानावर पाडून घेतल्या जातात व त्या पानासकट वाफवल्या जातात. ह्या शेवया नारळाच्या रसाबरोबर किंवा आमरसाबरोबर खायला देतात."
कोकणातल्या का तुम्ही, मग बरोबर!!
सूड चे खरेच कौतुक वाटते, तो अशा टिप्स देतो तेव्हा :-)
अफलातून पाकृ . फोटोत समाधान मानून घेतले गेले आहे. जय हिंद .
नेहमीप्रमाणेच. पाकृ, फोटो आणि प्रेझेंटेशन लाजवाब.
तुझ्याकडे जेवढ्या पाकृ आहेत तेवढे नवनवीन कौतुकाचे शब्द पण नाहीत आमच्याकडे :(
हे फोटो घरी दाखवायला नकोत. लगेच फर्माईश होईल आणि वर शिव्या की तू असले काही करतच नाही.
सानिकाला तुरुंगात टाका!
कसल्या अफलातून रेसिपी देतेस गं !!!!!!
फोटो तर अगदी क्लासिक !!
We Live In The Era Of सानिकास्वप्निल.
इतक्या देखण्या पदार्थाला 'इडियाप्पम' असले येडचापसारखे नाव का ठेवले समजत नाही...
:) असेच म्हणते
झक्कास.
छान पाकृ आणी फोटो नेहमीप्रमाणेच
खास पाकृ आणि फोटो!
तुझी स्तुती करायला शब्द तोकडे पडतात बाकि पाकृ नेहमीप्रमाणेच छान
देव्हार्यात जशी अन्नपूर्णा देवी असते तशी मिपावर सानिका आहे.
अगदि बरोबर आमच्या डाएट्चे तीन तेरा वाजतात ग ......सानिका ताई
सानिकाला किती नावे ठेवणार तुम्ही लोक.
आणी वरील पाकृमधे " डाएट्चे तीन तेरा वाजण्यासारखे" काय आहे ते जरा विस्कटुन सांग.
मस्त पाकृ... आवडेश. ;)
छान दिसते आहे करुन बघते :)
हे चायनीज राईस नूडल्स (सेलोफेन) वापरून करता येइल का? सोर्या नाहिये :(
सेलोफेन वापरुन कसे लागेल माहित नाही, त्या शिजवायला ही वेळ लागतो असे ऐकले आहे :(
ट्राय करुन बघा.
मागे एकदा मैत्रीणीने फालुदा बनवताना सेलोफेन वापरल्या होत्या.
गुपित फुटल सानिका!
तुझ्याकडे अलिबाबाचा दिवा आहे, तू चुकुन त्यातच रसम भरलस तेंव्हा दिसला आम्हाला.
तों. पा. सु.
तुमच्या कडे पंचतन्त्राची वेगळी प्रत दिसते आहे. Standard प्रतीत हा उल्लेख नाही ;-)
मस्तच सानिकाताई.. प्रेझेन्टेशन खरच खूप आवडल, विशेशतः ते सहित्य प्रमाण दा़खवण्यासाठी वापरलेली युक्ती.. मस्तच
कसली जबरी पाककृती आहे. सध्या तरी पाककृती बघूनच समाधान करायला लागेल.. :(
- पिंगू
सानिकाजी पाकृ बरोबर एक धागा तुम्ही तुमच्या टापटीप तसेच निगुतीने स्वयंपाक कसा करावा या विषयी टाका.
हा अजूनही न सुटलेला प्रश्न आहे.
कारण सानिका ताईंचे पदार्थ इतके सुदंर असतात कि तेच करून खावेसे वाटटात आणि मग डाएट्चे खल्ले जात नाहि.....
वॉव !!!
इडीयाप्पाम बघून कुरडयाची आठवण झाली .बाकि पाककृती नेहमीप्रमाणेच झक्कास !!
http://mejwani.in/