बातमी

जालना तालुक्‍यात २३० कुपोषित बालके

-१७ Oct९ber २००८

जालना- जिल्ह्यात श्रेणी तीन व चारमधील कुपोषित बालकांची संख्या सर्वांत जास्त २३० एवढी आहे. त्यातही जालना तालुक्‍यात कुपोषित मुलांचे प्रमाण सर्वाधिक आहे. हे प्रमाण कमी करण्यासाठी युद्धपातळीवर प्रयत्न केले जात असल्याची माहिती जिल्हा परिषदेतील महिला व बालकल्याण विभागाचे उपमुख्य कार्यकारी अधिकारी सुखदेव भेले यांनी दिली.

गुरुवारी (ता. १६) येथील (कै.) शंकरलाल मुंदडा मतिमंद बालगृहातील कुपोषित बालकाचा मृत्यू झाला. त्यानंतर सर्व यंत्रणा खडबडून जागी झाली. जिल्ह्यात श्रेणी तीनची- २०८ आणि श्रेणी चारची-२२ कुपोषित मुले आहेत. यात सर्वांत जास्त कुपोषित मुलांची संख्या ही जालना तालुक्‍यात असून, त्याची संख्या ५० आहे.

कुपोषित बालकांना अंगणवाडी कर्मचाऱ्यांच्या माध्यमातून आणि बचतगटांच्या मदतीने पोषण आहार पुरविण्यात येतो. जिल्ह्यात एक हजार पाचशे अंगणवाड्या आहेत. जी मुले जास्त अशक्त आहेत त्यांना सोयाबीन; तसेच इतर पोषकतत्त्वे असलेला आहार पुरविण्यात येतो. याबाबत त्यांच्या घरी जाऊन पालकांना आहाराविषयीची माहिती देऊन त्याचे महत्त्व पटवून दिले जाते. मानव विकास निर्देशांक उपक्रमातूनदेखील कुपोषण; तसेच बालमृत्यूचे प्रमाण कमी करण्यासाठी जालन्यातील मंठा आणि घनसावंगी तालुक्‍यांत विशेष प्रयत्न केले जात आहेत.

अशा उपाययोजना राबवूनही राज्यात कुपोषणाचे प्रमाण कमी झाले आहे, असे म्हणता येत नाही.
---------------------------------------------------------------------------------------------

आताच दै.सकाळ च्या इंटरनेटआव्रुत्तीवर प्रकाशित झालेली ही बातमी वाचून वाईट वाटले.कुपोषणामुळे एका निष्पाप बालकाचा मृत्यू झाला.खरोखरचं लाज वाटते आपल्या येथील झोपलेल्या यंत्रणेची.जालना जिल्ह्यात श्रेणी तीन व चारमधील कुपोषित बालकांची संख्या सर्वांत जास्त २३० एवढी आहे.ही आकडेवारी आपल्याला आरोग्य खात्याची यंत्रणा कशी झोपलेली असते,हे स्पष्टच सांगते. जगात सर्वात अधिक लहान मुलांची संख्या भारतात आहे.बालाआरोग्यच्या द्रुष्टीने सरकारने विविध योजना सुरु केल्या.अंगणवाडीच्या माध्यमातुन माता आणि बाळाचे स्वाथ्याची निगा ठेवणे,बालविकास परियोजना,गावागावात प्राथमिक आरोग्य केंद्र उभारुन मोफत सेवा देणे,आरोग्य सुधारणेवर भर देणार्‍या योजना अंमलात आणुनही आपल्या समाजात अन्नाअभावी जीव जाणार्‍या घटना घडावी ही लज्जास्पद गोष्ट आहे.