दर्दी खवय्ये कुठ मिळतील ??

दर्दी खवय्यांची मुंबई/ठाण्यात वानवा नाही रे शेरभाई. १९४०च्या दशकात सुरु झालेल्या गिरगावातील अनंताश्रम्/माधवाश्रमपासुन मग महेश लंच होम,सचिन ते गजाली/सायबा/म्हावरं.. खवय्ये दाद देत आहेतच. मत्स्याहारी दर्दी खवय्या तंदूर प्रॉन्स स्टार्टर वगैरेच्या भानगडीत न पडता सरळ सुरमई ताट+ जोडीला तळलेली मांद्याळी मागवतो.

विकायला तर काहीही विकले जाऊ शकते, तुम्ही मासळी उत्तमच आणणार अन् बनवणार ह्यात काही शंका नाही, पण आधीच इतकी हॉटेल्स अन् महेश लंच होम सारखी चेन रेस्टॉरंट्स धंद्यात असताना तुम्हाला फक्त ताज्या फडफडीत बांगड्यांवर फोकस ठेऊन चालणार नाही.

Authentic असे ब्रॅण्डिंग करावे लागेल, भले हो त्या आगरी/ कोळी समाजाचे अन् त्यांच्या खाद्य परंपरांचे की मुंबईत अजून authentic मासे मिळतात नाहीतर कोल्हापुरी म्हणून लाल ग्रेव्ही अजून लाल करत वरती एक तळलेली लालमिर्ची खोचून शेट्टी लोकांनी पुरेसा कचरा केलाच होता जेवणाचा.

एम्बियंस, चव, ब्रॅण्डिंग ह्याचा मिलाफ केला तर उत्तम होईल असे ह्या निमित्ताने सुचवतो, इथेच मागे बहुतेक खरडफळ्यावर मी टक्का नाका, पनवेल इथल्या साईकृपा ढाब्याची जाहिरात केली होती, आगरी पद्धतीने बनवलेली बकरा मुंडी मसाला आणि लसूण भेजा फ्राय अतिशय उत्तम आहेत तिथली,

असे तुमच्या आजूबाजूच्या मासळी स्पेशल हॉटेल्स मध्ये जेवून बघा, मासे टू मासे, डिश टू डिश कंपेर करा, उदाहरणार्थ एखाद ठिकाणी फ्रेश अगळ वापरलं आहे एखाद ठिकाणी मुरवलेलं वापरलं आहे, त्यात तुम्ही काही इनोवेशन करू शकता का ? नवीन काय मसाले बनवू अन् ट्राय करू शकता, एखाद usp डिश ठेवायची असल्यास आपण ती काय ठेवाल ? असा विचार पहिले सांगोपांग करा.

यश तुमचेच आहे , रेस्टॉरंट सुरू केलं की सांगा आवर्जून भेट देऊ,

टीप :- मिपाकरांना कौल लावा, मासेप्रेमी जनता खूप आहे इथे, दहा माणसे सोबत घेऊन कट्टा करायला तुमच्या हॉटेलमध्ये धडकतील येऊन. रेफरल डिस्काउंट देणार असलात तर माणसे पाठवतील हॉटेलमध्ये ती अलगच.

धन्यवाद माई G, वांड Gआणि साहना G. तुमच्यामुळे Current Trend कळला.
पण मुळ मुद्दा बाजूलाच राहिला कि! Location बद्दल आपले विचार कळले तर नक्की आवडेल.
ठिकाण ठरे पर्यंत सध्या आम्ही Zomato & Swiggy वरून सुरुवात करावे का ??

ठाण्यात राहता तर तुम्हाला फिशलॅन्ड हॉटेल माहिती असेलच?

तिथं फिश टॅंक मधले तुम्हाला हवाय तो मासा घेऊन तुमच्या समोर अर्ध्या तासात पदार्थ तयार करून देतात.

एकदा भेट देऊन बघा.

साहना ताई त्या हॉटेलचं नावं गोमंतकच आहे.
आणि दादर आणि गिरगांव दोन ठिकाणी आहे.

मत्स्याहारींसाठी हाटील जरा गुंतागुंतीचा मामला आहे. इतके विविध प्रकारचे मासे असतात. त्यांच्या किंमतीतही तफावत असते. पुन्हा मासे ताजे नसतील तर चव बिघडते हे ही आहे.

मत्स्याहारी म्हणून अशा हॉटेलांना भेट दिलेल्या हॉटेलातील माझा अनुभव साधारण असा आहे: मुख्यतः सुरमई, पापलेट आणि बांगडा या माशांच्या थाळ्या उपलब्ध असतात आणि गिर्हाईकेही साधारण याच थाळ्या मागवतात. यातील सुरमई, पापलेट किलोला ९०० - १००० च्या आसपास मिळत असल्याने ही थाळीही ५०० - ६०० वर जाते. चव असेल तर चांगले गिर्हाईक किंमतीचा विचार करत नाहीत. चव चांगली असेल तर बजेट थाली म्हणून बांगडा थाळी मागवली जाते.

जागा ठरेपर्यंत स्विगी झोमॅटोचा विचार करायला हरकत नाही. मी आणि माझे काही मित्र पुण्यात सत्कार मालवणी आणि वेरनेकर गोवन फिश करी ऑनलाईनच मागवतो.

जेवण आणि क्वांटीटी उत्तम असेल तर लोक कुठेही येतात..

सुरुवातीला फूड ब्लॉगर बोलावून. रील , शॉर्ट च्या माध्यमातून तुफान जाहिरात करा, eat out चे फेसबुक ग्रुप्स असतात त्यावर उत्तम रिव्ह्यू सतत येत राहतील याची "सोय " करा.. उत्तम फूड फोटोग्राफर hire करून फोटो काढून गुगल रिव्ह्यू आणि फेसबुक , इंस्टा वर अपलोड करा....

ओळखीच्या लोकांकडून गुगल रेटिंग ४+ राहतील याची काळजी घ्या..
डिजिटल मार्केटिंग वाले hire करा, सर्च मध्ये सतत टॉप पेज वर राहाल याची काळजी घ्या...

कुठल्या ठेसनांत जायचे ठरत नव्हते, आणि काही जाणते जुन्या, नव्या गोमंतकच्या रम्य आठवणींमध्येच रमत असल्याने, तसही ठाण्यात तीन हात नाक्याजवळसुद्धा एक गोमंतक आहेच!!!!

मग आम्ही Zomato बाबा आणि Swiggy ताईला शरण गेलो. बर आम्ही नवखे, त्यात (दुकानाच्या) जागेचा अजून शोध लागला नाही, म्हणून आम्ही On – Line onboarding करून पहिले. पण तेव्हापासून आम्ही BOT’s च्या विळख्यात अडकलो आहोत. गंमत अशी काहीही विचारले तर Zomato बाबा म्हणतात “Please contact your Zomato Account Relationship Manager.” आणि mail केले तर विचारतात “We care for you, how can we help?” बस्स इतकच.

आमच्या एका सुज्ञ परिचिताने सांगितले कि जेव्हा या बाबा किंवा ताईंचे दूत तुमच्या आसपास फिरत नसतात तेव्हा हे लोक खुशाल आम्हाला Off Line दाखवतात, तो एक वेगळा त्रास आहेच.

तरीही, Zomato आणि Swiggy ची लिंक अती धाडसाने खालीलप्रमाणे देत आहे:
Zomato:
https://www.zomato.com/mumbai/savitris-kitchen-2-vikhroli
Swiggy:
सध्या दाखवत नाही आहे

नवीन कार्यास शुभेच्छा.

क्लाउड किचन बद्दल हा व्हिडिओ थोडी मदत करू शकेल. थोडा मोठा आहे. जमल्यास बघून घ्या

खुपच छान. पण आता सदस्यता स्वीगीकडे फुकट आहे आणि झोमाटो विकत आहे. दोघेही पूर्ण यांत्रिक झाले आहेत, माणस शोधूनसुद्धा सापडत नाहीत.

१. अभिनंदन!
२. हॉटेल 'भन्नाट' नाव व 'भन्नाट' मेन्यू यांच्या बळावर नव्याचे नऊ दिवस या न्यायाने फक्त काही दिवसच चालेल. त्यानंतर फक्त लिगॅसीवर चालते.
३. हॉटेलचे नाव सामान्य दर्जाचे ठेवा जेणेकरून हॉटेल कमीत कमी ५० वर्षांचे आहे असा 'भास' निर्माण होईल. उदा. 'मावल्ली टिफिन सेंटर'. भयंकर खराब उदा. 'रॉनीज भन्नाट चवीचा चस्का मिसळ.' हॉटेलचे नाव विशेषतः मांसाहारी हॉटेलचे नाव जितके सामान्य तितके अपील. महेश लंच होम, अनुराधा खानावळ, सत्कार भोजनालय, आवारे खानावळ, घोरपडे थाळी सेंटर अशा धर्तीचे नाव ठेवा. जितके मंडेन तितके चांगले. किचनयुक्त नावे अलीकडची आहेत ती टाळा.
४. प्रत्यक्षात फूटप्रिंट आणि ऑनलाईन सेल्स यांची कल्पना सुरुवातीपासूनच असलेली बरी.
५. मांसाहारी हॉटेलांना सिलेक्शन पॅरालाईसिस प्रचंड घातक असतो. मेन्यू जितका कमी तेव्हढी लिगॅसी तयार होते. तुम्ही उदा. मिलन खानावळीच्या बाहेर उभे आहात. तुमचा नंबर आला की तुम्हाला पटकन ऑर्डर द्यायची आहे. समोर बोर्डावर लिहिलेला मिनिमल मेन्यू हाच उपयोगी येतो. माझ्या मते ग्राहक मांसाहारी हॉटेल्स मध्ये वैविध्य चाखायला जात नाही. सिगरेटचा ब्रँड जसा ठरलेला असतो तसाच कंड सुटला की लोक मांसाहार करतात. चॉईस घातक आहे. ऑनलाईन सेल्समध्ये माझ्य अनुभवाने स्टार असलेले( सारखे खरेदीकेलेले), फोटो असलेले मेन्यू आयटमच जास्तीत जास्त खपले जातात.. खाद्यपदार्थ निवडण्यात खूप कमी वेळ लागला पाहिजे. अगदी काही सेकंद. ग्राहक विषेशतः स्वीगी, झोमॅटो वरचा हा केवळ तुमच्याच हॉटेलातले अन्न मागवायचे म्हणून आलेला नसतो. फॅमिलीसाठी म्हणून, साईड डिश म्हणून, हे पण देतो, ते पण देतो, अर्धाच देतो, पाऊणच देतो, वगैरे प्रकार कमी करावेत. सिंपल आणि स्टुपिड मेन्यू असायला हवा.. व्हेज फटफटी का व्हेज रॉयल एन्फिल्ड का व्हेज लूना असला ढाबाछाप मेन्यू पूर्णपणे टाळा. बिर्याणीचे वगैरे सतराशे साठ प्रकार न करता एकच प्रकार तुमच्या स्पेशालिटीसह ठेवा.
६. मस्त्याहारी हॉटेलांत सुद्धा ठराविक थाळ्याच जास्त खपतात. तर पूर्ण फोकस फक्त त्याच थाळ्या परफेक्शनकडे नेऊन तुम्हाला लिगॅसी तयार करता येईल. तुम्ही थाळ्यांचे स्पेशल, अल्ट्रा, डिलक्स, हडकुळी, चिल्ड्रन, झिरो फिगर, लो कॅलरी असले प्रकार ठेऊ नका. त्याने मागवणार्‍यांचे गोंधळ उडतात. वरती 'डिलक्स थाळीत बांगड्याचा १० ग्रॅमचाच तुकडा होय' असली मानसिकता तयार होते. बांगडा थाळी असेल तर फक्त बांगडा थाळी, रोहू थाळी असेल तर फक्त रोहू थाळी असंच ठेवा. त्यांचे अजून व्हेरियेशन्स नको. व्हेरियेशन्स झाले तरी 'निवड' करायला खूप कमी वेळ लागला पाहिजे हे लक्षात ठेवा!
७. पेशन्स! प्रचंड पेशन्स! वर्षानुवर्षांचा पेशन्स!

हणमंतअण्णा शंकराप्पा रावळगुंडवाडीकर G, तुमच्या सूचना खरच खूप मोलाच्या आहेत, इतक्या कि त्यांची एक प्रत काढून आमच्या मालकीण बाईंना दिली.
गविGनी म्हटल्याप्रमाणे बोर्डाची कल्पना मस्तच आहे, सध्या Online, आम्ही आमचा मेन्यू खूप छोटा केला आहे.
तुम्ही बनवलेला पदार्थ प्रत्येकजणाने आवडीने खावा यासाठी मुळात तुम्ही तो मन लावून बनवला पाहिजे अस आमची आजी म्हणायची, त्याची आठवण झाली.
वामन देशमुखG सध्या ठेसन ठरत नाहीये, पण जेव्हा ठरेल तेव्हा आपण सगळ्यांना यायचेच आहे.
आमच्या हाटीलचे नाव "Savitri’s Kitchen" किंवा "सावित्रीचे किचन" आहे. (आमच्या सुगरण आजीचे)

शेर भाई तुम्हाला व्यवसायवृद्धी साठी खूप खूप शुभेच्छा 👍
(मी मत्स्याहारी नसल्याने शुभेच्छा व्यतिरिक्त कुठल्या टिप्स वा सल्ला देऊ शकत नाही)

शेर भाई, तुम्हाला तुमच्या व्यवसायाठी शुभेच्छा.
मी शाकाहारी असलो तरी मत्स्याहारी धागे वाचायला आवडतात. :)
वरती हणमंतअण्णा शंकराप्पा रावळगुंडवाडीकर यांनी दोन अप्रतिम प्रतिसाद दिले आहेत ते वाचले आणि या धाग्यावर आल्याचे समाधान मिळाले ! :)

मदनबाण.....
आजची स्वाक्षरी :- हृदयी वसंत फुलताना-Hridayi Vasant Phultana Full Song :- Takatak 2

" अजून एक महत्वाची अडचण म्हणजे बहुतेक भारतीय अन्न हे स्केलेबल नाही. (म्हणजे तुम्ही पालेभाजी एका छोट्याशा कढईत ठराविक मर्यादेतच चांगली करू शकता. शंभर माणसांसाठी मेथीची भाजी सहजगत्या करता येत नाही) ..... १०० % खरे आहे .

त्यासाठीच मला लग्न , मोठे समारंभ इ. वेळी स्वयंपाक बनविणारे बल्लवाचार्य ह्यांचे नेहमीच कौतुक वाटते .

बाकी ह्या धाग्यातील हणमंत अण्णांचे प्रतिसाद म्हणजे आइसिंग ऑन केक आहेत _/\_ आणी शेर भाई तुम्हाला व्यवसायवृद्धी साठी खूप शुभेच्छा .

वेझ मासा हा प्रकार ठेवला तर ग्राहक बेस निश्चित वाढेल. एवढे लोक सल्ला देत आहेत माझी बोटे ही शिव शिव लागली. टंकून टाकला एकदाचा सलला .

तुम्ही अशा हॉटेलांना भेट दिली असणारच. त्यात एक भर सांगू इच्छितो. श्रीवर्धन बस डेपोजवळच असणारे विचारे यांचे 'स्वाद'. वेज नॉनवेज दोन्ही थाळ्या. रात्री साडेआठ ते बारा टुअरवाल्या बसेस येतात.( राहाण्याचे लॉजही आहे जवळच.)