फुलगोबीची सुकी भाजी

या क्षेत्राचा तसा बिल्कुलच अनुभव नसल्याने इतके दिवस ज्या धाग्यांना फाट्यावर मारत असु, तिथे येउन पाकृ द्यावी लागणे म्हणजे अजबच आहे. पण भाजी करण्याचा पैला-वैला प्रयत्न अन तो ही सफल... म्हणुन म्हटले "लोहा गरम है मार दो हथोडा"...
================================================================

तर फुलगोबी म्हंजे फ्लॉवरची सुकी भाजी कशी बनवायची?

सामग्री :: (२ जणांसाठी)
मोठ्या फ्लॉवरच्या फुलातील २ लहान फुलं, मोहरी, जिरे, हळद, तिखट, काळा मसाला, अर्धे गाजर, लसुन-आलं पेस्ट, मीठ अन तेल.

कृती :: सर्वप्रथम फ्लॉवरचे हातानीच लहान-लहान तुकडे करुन घ्या. मग ती फ्लॉवर धुवुन घ्या. धुतलेल्या फ्लॉवरवर अर्धा चमचा हळद घाला.

गाजर धुवुन, बारीक चिरुन घ्या. मग कढइ शेगडीवर मंद आचेवर ठेवा. कढइ गरम झाल्यावर त्यात अंदाजे २ चमचे तेल घाला. तेलात थोडीशी मोहरी अन जिरे घाला.

फोडणी बसेपर्यंत एका थाळीत चिरलेला गाजर, १/२ चमचा काळा मसाला, २ चमचे तिखट, १ चमचा लसुन-आलं पेस्ट मिसळुन घ्या.

नंतर हे सर्व त्या कढइत परतुन घ्या.

आता त्यात हळदयुक्त फ्लॉवर घालुन चमचाने हलवा. त्यात चवीनुसार थोडेसे मीठ घाला.

हे सर्व मिश्रण १० मिनिटे शेगडीवर (मंद आचेवर) ठेवा. फ्लॉवर ओली असल्याने लवकर शिजते. हे मिश्रण जास्त वेळ शेगडीवर ठेउ नये, त्याने फ्लॉवरचा "शिरा" होउ शकतो. (जसा पोहे जास्त भिजवल्याने होतो तसा).

ही झाली फुलगोबीची सुकी भाजी तयार. कोथिंबीर असल्यास वरुन घालता येते.

मित्रांनो, फ्लॉवर ही सगळीकडे सहज उपलब्ध होत असल्याने एकदा ही भाजी करुन बघायला काहीच हरकत नाही. करा, चाखुन पहा अन मला सांगा.
(कुणीतरी सांगितलेच आहे पाण्यात उडी मारली की पोहता येतेच, हेही तसेच आहे)

जाणकार/सुगरण मिपाकर गृहिणींच्या सल्ल्यांच्या अपेक्षेत/प्रतिक्षेत.

- आपला वपाडाव